Qazaqstan prezıdenti Nursultan Nazarbaev AQSH-qa resmı sapary aıasynda osy eldiń bıznes jetekshilerimen kezdesti, dep Qamshy.kz aqparat agenttigi Azattyqqa siltep jazady. 

Aqorda baspasóz qyzmetiniń habarlaýynsha, sapar aıasynda ınvestısıalyq jáne saýda-ekonomıkalyq yntymaqtastyqqa qatysty 7 mıllıard dollardyń 20-dan astam komersıalyq qujatyna qol qoıylǵan. Bul qarjy avıasıa jáne ǵaryshtyq zertteýler, munaı hımıasy men aýyl sharýashylyǵy jáne ınfra qurylymdy damytý salalaryndaǵy jobalardy iske asyrýǵa bólinbek.

Sonymen qatar úkimetaralyq úsh kelisim jasalǵan. Olar – Memlekettik áýe kemelerine aeronavıgasıalyq qyzmet kórsetkeni úshin aqy almaý týraly kelisim, Qazaqstan terıtorıasy arqyly komersıalyq temirjol tranzıtin qamtamasyz etý kelisimge hattama jáne Halyqaralyq salyq dısıplınasyn jetildirý týraly kelisim.

Resmı málimet boıynsha, kezdesýde Nazarbaev sapar barysynda qabyldanǵan eki jaqty qarym-qatynasty tutastaı qamtıtyn keńeıtilgen strategıalyq áriptestik týraly birlesken málimdemeniń erekshe máni baryn aıtty. Ol Qazaqstanda memlekettiń bıznes júrgizýge jaǵdaı jasap jatqanyn, respýblıkanyń transporttyq jáne tranzıt áleýeti arta túskenin jáne «Astana» halyqaralyq qarjy ortalyǵynyń jumysyna qatysýshylarǵa birqatar jeńildikter jasalyp otyrǵanyn aıtyp, amerıkalyq bıznesmenderdi Qazaqstanda birlesken jobalardy iske asyrýǵa shaqyrdy.

AQSH isker top ókilderi Qazaqstanmen ekonomıkalyq yntymaqtasty keńeıtýge múddeli ekenin bildirgen.

Qazaqstan prezıdentiniń AQSH-qa resmı sapary 16 qańtar kúni bastalǵan. Keshe Nazarbaev Aq úıde AQSH prezıdenti Donald Tramppen kezdesken.