Almatydaǵy tasymaldaýshy  kompanıalar qala ákiminen avtobýs parkteriniń shyǵyndaryn jeńildetýge nemese avtobýs pen troleıbýs jolaqysyn 150 teńgege kóterýdi surady dep habarlaıdy Qamshy.kz aqparat agenttigi tengrinews.kz-ke silteme jasap. 

«Qaladaǵy jolaqyny komısıa 2017 jyly naýryzda bekitken. Bizde tarıf 72 teńge, 10 paıyzyn tasymaldaý holdıńine beremiz. Eldiń kóp aımaqtarynda jol aqy 90 teńgege jetti (Qostanaıda aqpan aıynan bastap jol aqy 100 teńge),  al bizde áli kúnge deıin 80 teńge. Biz Almaty qalasy ákimine hat jazdyq. Onda tarıfterdi qaıta qaraýdy jáne shyǵyndardy sýbsıdıalaýdy talap ettik. Biz asosıasıalardyń barlyq kásiporyndarǵa tolyq kólemde sýbsıdıa tóleýin nemese zańǵa sáıkes jolaqynyń ózgergenin qalaımyz. Jolaqy 150 teńgege kóterilmese, shyǵynǵa batamyz. Tolyq sýbsıdıalanǵan jaǵdaıda tarıf 100-120 teńgege kóteriledi dep boljap otyrmyz. Biz jolaqynyń qymbattaǵanyn qalamaımyz. Biraq ol úshin tasymaldaýshy kompanıalardy qarjylandyrý kerek. Iaǵnı sýbsıdıa bólinýi kerek», - dep habarlady Almaty qalasy jolaýshylardy tasymaldaý kásiporyndarynyń asosıasıasy.

«Áleýmettik mańyzy bar baǵyttarda avtobýs parkteri kúrdeli qarjylyq qıyndyq kórip otyr. Bul avtobýstardyń qyzmet kórsetýiniń toqtaýyna ákelýi múmkin. Ótken besjyldyqtaǵy teńgeniń qunsyzdanýyna baılanysty tasymaldaýshy kompanıalardyń qyzmet kórsetý men jóndeý jumystaryna ketken shyǵyny aıtarlyqtaı ósti, biraq jolaqy 2012 jyldan beri kóterilmedi», - delingen avtoparktiń qala ákimine jazǵan ótinishinde.