Dýbaı áýe keńistiginde jýyq arada kóliktiń erekshe túri - júrgizýshisiz basqarylatyn taksıler paıda bolady. 6-shy Búkilálemdik úkimettik samıtte osyndaı joba tanystyryldy, dep habarlaıdy Qamshy.kz aqparat agenttigi TASS saıtyna silteme jasaı otyryp.

Sharaǵa 140 elden kelgen 4 myńnan astam delegat qatysýda. Taksıdiń jańa túrin shyǵarý bastamasyn Germanıanyń Volocopter kompanıasyna yntymaqtastyq jasaýdy usynǵan Dýbaı jol jáne kólik basqarmasy kóterdi.

Joba avtorlarynyń aıtýynsha, Dýbaıdyń áýe taksıleri - kóliktiń ekologıalyq taza túri. Ol elektrmen jumys isteıtin bolady. Jobaǵa sáıkes, ushý uzaqtyǵy 30 mınýttan, jyldamdyǵy saǵatyna 100 kılometrden, al bıiktigi 2 myń metrden aspaıdy. 

Budan buryn BAÁ premer-mınıstri jáne Dýbaı ámiri sheıh Muhammed bın Ráshıd ál-Maktým 2030 jylǵa qaraı qaladaǵy ózdiginen júretin kólik quraldary 25%-ǵa jetetinin málimdegen bolatyn.