Shymkentte kásipkerden 7 mln dollar bopsalaǵan tanysy sottaldy. Oblystyq Qylmystyq ister jónindegi mamandandyrylǵan aýdanaralyq soty aıyptalýshy Bóıkeıhan Qaıypnazarovty 7 jylǵa bas bostandyǵynan aıyrdy, dep habarlaıdy Qamshy.kz aqparat agenttigi QazAqparatqa silteme jasaı otyryp.
Sot barysynda 56 jastaǵy aıyptalýshynyń qylmysy tolyǵymen dáleldenip, ol Qylmystyq kodekstiń 194 baby «Qorqytyp alý» boıynsha kináli dep tanylyp, abaqtyǵa jabyldy.
«Jaza qylmystyq atqarý júıesiniń qaýipsizdigi asa joǵary mekemesinde óteý belgilensin. Jazanyń óteý merzimi 2017 jyldyń 15 tamyzynan bastap eseptelsin. Oǵan qatysty tańdalynyp alynǵan bultartpaý sharasy burynǵysynsha kúzetpen ustaýda qaldyrylsyn»,- dedi sotta isti qaraǵan sýdıa Samıdın Temirálıev.
Esterińizge sala keteıik, Bókeıhan Qaıypnazarov Shymkenttik olıgarh Serikjan Seıtjanovtan 7 mıllıon AQSH dollaryn talap etken. Ol ótken jyldyń sáýiri men shilde aıy aralyǵynda kásipkerdiń uıaly telefonyna birneshe ret habarlama jiberip, qorqytqan. Iaǵnı iri kólemdegi qarjyny bermese, kásipker men onyń týystaryna qatysty málimetterdi ǵalamtorǵa jarıalaıtynyn jazǵan. Al, 15 tamyzda aqshany alyp jatqan kezinde qolǵa túsedi. Sot barysynda belgili kásipker aıyptalýshy tanysyna eshqandaı qaryz emes ekenin, qaryzyn kezinde ótep qoıǵanyn aıtqan edi. Tipti 7 balasy bar kúdiktini keshiretinin de jetkizgen bolatyn.
Aıta keteıik, Serikjan Seıitjanov «Forbes» deregi boıynsha elimizdegi elý yqpaldy bızmender tiziminde 18-shi orynda turǵan kásipker. Jaqynda onyń nemeresi Memleket basshysynyń nemere inisi Qaırat Satybaldynyń qyzymen úılenip, Seıitjanov Nazarbaevtar áýletimen quda boldy.
