Almatyda avtobýstan qulap qalǵan jolaýshy áıel men júrgizýshi arasyndaǵy daý medıasıa tártibimen sheshildi, dep habarlaıdy QazAqparat-qa silteme berip Qamshy.kz aqparat agenttigi.

Atalǵan is Túrksib aýdandyq sotynyń qaraýynda bolatyn. Júrgizýshige qatysty QR QK 345-babynyń 1-bólimimen aıyp taǵylǵan edi.

Sot talqylaýy kezinde zardap shekken áıel qylmystyq isti toqtatýdy surady.

Onyń aıtýynsha, avtobýs júrgizýshisi keltirilgen shyǵyndy tolyq ótegen. Sol sebepti taraptar medıasıa tártibimen kelisimge keldi.

Túrksib aýdandyq sotynyń sýdıasy QR QK 68-babynyń 1-bólimin negizge ala otyryp, júrgizýshini qylmystyq jaýapkershilikten bosatty.

Aıta ketý kerek, jol apaty byltyr 8 tamyzda bolǵan edi. Avtobýs júrgizýshisi «VAZ» aıaldamasynan asa bergende esikti jabýdy umytyp ketken. Sonyń kesirinen júrip bara jatqan avtobýstan áıel qulap túsken. Jol apatynan jolaýshy orta dárejeli jaraqat aldy.