Búgin Aýyl sharýashylyǵy mınıstrliginde QR Premer-Mınıstriniń orynbasary – Aýyl sharýashylyǵy mınıstri Ó.Shókeevtiń tóraǵalyǵymen keńeıtilgen alqa otyrysy bolyp ótti, dep habarlaıdy Qamshy.kz aqparat agenttigi.
Mınıstrlikte ótken keńeıtilgen alqa otyrysynda 2017 jylǵy atqarylǵan jumys qorytyndylary men Memleket basshysynyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty joldaýy aıasynda 2018 jylǵa arnalǵan negizgi mindetter jaıynda aıtyldy.
Beınekonferensıa baılanys arqyly júrgizilgen sharaǵa oblystyq ákimdikterdiń, agrobıznes jáne qoǵam ókilderi qatysty.
Keńeıtilgen alqa otyrysynda agroónerkásiptik keshen aldynda eńbek ónimdiligin arttyrý jáne óńdelgen aýyl sharýashylyǵy ónimderin eksporttaýdy 2,5 esege artyrý mindeti júktelgeni jaıynda sóz boldy.
«Eńbek ónimdiligin arttyrý úshin jaǵdaıdy túbegeıli ózgertýge bolatyn 4 negizgi baǵytty anyqtadyq: dál qazirgi zamanaýı tehnologıalardy engizý, aýyl sharýashylyǵy tehnıkasyn jedel túrde jańartý, mal sharýashylyǵyn damytý jáne sýarmaly jerlerdi qarqyndy túrde engizý. Dál osy baǵytta memlekettik qoldaý saıasaty engiziletin bolady», - dep atap ótti QR Premer-Mınıstriniń orynbasary – Aýyl sharýashylyǵy mınıstri Ómirzaq Shókeev.
2017 jylǵy Agroónerkásip kesheniniń jumysyn qorytyndylap, ASHM vıse-mınıstri R.Qurmanov «2017 jylǵy agroónerkásiptik keshendi damytý qorytyndylary» týraly baıandama jasady.
«Ótken jyl ekonomıkanyń agrarlyq sektory úshin óte tabysty boldy. Aýyl sharýashylyǵy ónimderiniń jalpy ónimi 2,9%-ǵa ratyp, 4,1 trln. Teńgeni qurady. Sonymen qatar, azyq-túlik óndirisi 4,1%-ǵa artty», - deıdi R.Qurmanov.
Onyń aıtýynsha, 2017 jyldyń qorytyndysy boıynsha, aýyl sharýashylyǵy kooperatıvteri 19 myń tonna et, 132 myń tonna sút jáne de 33 myń tonnadan astam jemis óndirilgen.
Aýyl sharýashylyǵy ónimderi men olardy eksporttaýdy 2,5 esege arttyrý máselesin sheshý úshin Aýyl sharýashylyǵy vıse-mınıstrleri óz baıandamalarynda AÓK-ti damytýdyń basty qadamdaryna nazar aýdardy.
ASHM birinshi vıse-mınıstri Arman Qaıratuly QR Aýyl sharýashylyǵy mınıstrlginiń 2018 jylǵa arnalǵan josparymen tanystyryp ótip, AÓK ónimin 2,5 esege artyrý máselesiniń mańyzdylyǵyn atap ótti.
«Bizdiń aldymyzda agroónerkásip ónimdiligi men óńdelgen ónimderdi eksporttaýdy 2,5 esege arttyrý mindeti tur. Osy mindetterdi oryndaý úshin biz Mınıstrliktiń negizgi kúshi men resýrstaryn 9 negizgi baǵytqa qaraı aýdaramyz:
– Qarjylandyrýdyń qoljetimdiligin arttyrý;
– Saýda naryqtaryn keńeıtý jáne aýyl sharýashylyǵy ónimderiniń eksportyn damytý;
– Memlekettik baqylaý men qadaǵalaý tıimdiligin arttyrý;
– Salyq tólemderin jetildirý;
– Agrarlyq ǵylym, bilim berý jáne bilim taratý júıesin reformalaý;
– Agroónerkásip keshenin sıfrlandyrý;
– Tehnologıanyń qol jetimdiligi;
– Bıologıalyq resýrstardy ońtaıly basqarý;
– Sý resýrstaryn paıdalaný tıimdiligin arttyrý.
Ár baǵytta ólshenetin kórsetkishter men naqty sharalar anyq kórsetilgen. Vıse-mınıstrlerdiń túpkilikti nátıjelerge arnalǵan mindetteri men jaýapkershiligi arnaıy memorandýmda Mınıstrlikpen bekitilgen. Munyń barlyǵy Mınıstrliktiń 2018 jylǵa arnalǵan jedel josparynda kórinis taýyp otyr. Ǵylym, bilim jáne bilimdi taratý; AÓK-ti sıfrlandyrý; tehnologıanyń qol jetimdi bolýy – osy úsh blokqa men ózim tikeleı jaýaptymyn», - deıdi Arman Qaıratuly.
Onyń aıtýynsha, agroónerkásiptik keshenin sıfrlandyrý isi asa mańyzdy bolyp tabylady.
«Munda eń basty kútiletin másele naqty fermerlik sharýashylyqtar men «aqyldy fermalar» elementterin engizýge basty nazar aýdarylatyn bolatyn. Birinshi kezeńde biz geopozıasıalyq, vegetatıvtik, agrohımıalyq, gıdrogeologomelıoratıvtik jáne metereologıalyq qabattarymen elektrondyq karta oryndaryn jasaý qajettiligin kórip otyrmyz», - dep aıtyp ótti birinshi vıse-mınıstr Arman Qaıratuly.
Onyń aıtýynsha, ónerkásipti sıfrlandyrý memlekettik zańdar men qadaǵalaýdyń senimdiligin arttyrady, joǵary tehnologıalardy engizýge yntalandyrady, memlekettik qoldaý sharalarynyń tıimdiligin arttyryp, olardyń ashyqtyǵy men fermerlerge qol jetimdiligi, sybaılas jemqorlyq kórinisterin azaıtady eken.
Sondaı-aq, vıse-mınıstr R.Qurmanov pen «QazAgro» UBH» AQ Basqarma tóraǵasy N:Malelov 2017 jylǵa arnalǵan agroónerkásiptik keshendi damytý qorytyndylaryn baıandady.
