Murathan Toqmádı sotta óz kinásin moıyndady, - dep habarlaıdy Tengrinews.kz.

"Kináńizdi moıyndaısyz ba?", - dep surady sýdıa.

"Iá", - dep jaýap berdi Murathan Toqmádı.

"Tolyqtaı moıyndaısyz ba?", - dep naqtylady sýdıa. 

"Iá", - dep jaýap berdi bıznesmen.

Prokýror kórsetilgen aıyptaýlardy oqyp shyqqannan keıin sýdıa basty sot otyrysynyń qandaı tártip boıynsha ótetinin túsindirdi.

Sottalýshy munymen kelisti, túsinik berýge daıyn. Qazirgi ýaqytta bıznesmen sot aldynda jaýap berip jatyr.

Osyǵan deıin Murathan Toqmádıdiń Taraz qalasynyń sotyna jetkizilgeni habarlanǵan bolatyn.

"05.02.2018 Jambyl oblysynyń Qylmystyq ister jónindegi mamandandyrylǵan aýdanaralyq sotyna M.Sh. Toqmádıge qatysty 96-baptyń 2 tarmaǵy "j, z" boıynsha qylmystyq is kelip tústi. İs materıaly boıynsha, Almaty qalasynda qylmystyq álemniń "bedeldisi" jáne "Depýtattyq korpýs" UQT basshysy M.Sh.Toqmádı "Bank Turan Alem"AQ basqarmasynyń burynǵy tóraǵasy E.N.Tátishevti óltirdi dep aıyptalyp otyr. Bul qylmystyq is "Tórelik" aqparattyq júıesimen sýdıaǵa qarastyrýǵa úlestirilgen. Qylmystyq isti qaraýdyń merzimi men kúni belgilenbedi", - dep habarlaǵan edi Jambyl oblysynyń Qylmystyq ister jónindegi mamandandyrylǵan aýdanaralyq sotynyń baspasóz qyzmetindegiler.

Eske sala keteıik, Murathan Toqmádı byltyr 12 maýsymda ustalǵan bolatyn. Almatyda arnaıy qyzmet "Depýtattyq korpýs" atty qylmystyq topty ustaý boıynsha operasıa ótkizgen edi. BAQ-ta shyqqan aqparat boıynsha, bul qylmystyq topty "QazSHynyQurylys" zaýytynyń ıesi Murathan Toqmádı basqarǵan. Sondaı-aq, prokýratýra málimetinshe, onyń úıin tintý kezinde qarý-jaraq pen oq-dári tabylǵan. Al taıaýda bıznesmenge qatysty úkim shyqqan. Murathan Toqmádı 3 jylǵa bas bostandyǵynan aıyrylǵan bolatyn.