Astanada jer týraly zań jobasyna qatysty qoǵamdyq talqylaý boldy. Muhtar Taıjan júrgizgen alqaly jıynǵa Aýyl sharýashylyǵy mınıstrliginiń ókilderi, Májilis depýtattary jáne ár óńirden qoǵam belsendileri qatysty, dep málimdeıdi Qamshy.kz aqparat agenttigi.

Jer týraly zańdy qoǵamdyq talqylaýda jeltoqsanshy, Jer komısıasynyń múshesi Nurlybek Qýanbaev «shetel azamattaryna jer satylmaýy kerek, jalǵa berilmeýi kerek» degen pozısıada qalatynyn aıtty.

– Negizgi aıtaıyn degenim – búgingi qoǵamdaǵy qaıshylyqtar, áleýmettik jelide «Muhtar ondaı, Aıdyn mundaı», Muhtar men Maqsat nemese Aıdyn men Maqsat dep bólinip alyp, jeke basqa tıisip jatady. Mundaı qoǵamdaǵy qaıshylyqtardy joıý kerek. Barlyǵymyzdyń da jerge bir adamdaı janymyz ashıdy, sondyqtan da mámilege kelip, bir jeńnen qol, bir jaǵadan bas shyǵaryp, bir judyryqtaı jumyla bilýimiz qajet. Barshańyzdy osyǵan shaqyramyn. Urys-kerispen eshteńe de bitpeıdi, sondyqtan eń aldymen aýyzbirshiligimiz myqty bolýy kerek, - dedi Nurlybek Qýanbaev.

Zańger, qoǵam belsendisi Aıgúl Orynbek te óz pikirin ortaǵa saldy.

– Osy jer daýynan keıin biraz adamdar qýdalandy, ony ózderińiz jaqsy bilesizder. Qazirgi tańda da qýdalanyp jatyr. Biraq bizdiń maqsatymyz sol ýaqytta jer komısıasy qurylyp, bıliktiń bizben ashyq jumys isteýi edi. Búginde, mine, jer komısıasy quryldy, bıliktegi aǵalarymyz tómen tústi halyqtyń arasyna. Demek, bizdiń maqsatymyz oryndaldy. Aldaǵy ýaqytta komısıa men biz Konstıtýsıaǵa, kodekstarǵa engiziletin zańdardy qaraýymyz kerek, áli kóptegen kemshilik bar. Sonymen qatar qoǵam belsendilerine shabýyldy toqtatý kerek. Ultym, jerim dep otyrǵan aǵaıyndarǵa aıtarym: jastardyń belsendiligin paıdalanyp, olardy qolshoqpar qylýdy toqtataıyq. Sebebi« erteń biz jastardyń saǵyn syndyramyz. Jer komısıasy qurylǵan kezde biz jerimizdi saqtap qalaıyq, - dep qysqa qaıyrdy qoǵam belsendisi.