Kastamoný qalasynda «Maǵjan Jumabaev jyly" saltanatty túrde  ashyldy, dep habarlaıdy Qamshy.kz aqparat agenttigi.

TÚRKSOI-ǵa múshe elderdiń ókilderi bıyl Túrkıanyń Kastamoný shaharynda bas qosty. Onda «Kastamoný – 2018 jylǵy Túrki áleminiń mádenı astanasy» jyly aıasynda qazaq ádebıetiniń jarqyn juldyzy, aqyn Maǵjan Jumabaev jylynyń saltanatty ashylýy ótti.

TÚRKSOI uıymynyń 2018 jylǵy is-sharalar josparyna sáıkes, Túrkıada qazaq aqyny Maǵjan Jumabaevtyń 125 jyldyq mereıtoıymen qatar, Ázirbaıjan Respýblıkasynyń ataqty kompozıtory Kara Karaev pen qyrǵyzdyń kórnekti jazýshysy Shyńǵys Aıtmatovty eske alý  jyly dep jarıalanǵan.

Sharaǵa TÚRKSOI halyqaralyq uıymynyń bas hatshysy Dúısen Qaseıinov, Túrkıanyń Mádenıet jáne týrızm mınıstriniń orynbasary Hýseın Iaıman, Kastamoný qalasynyń gýbernatory Iashar Karadenız, Kastamoný qalasynyń basshysy Tahsın Babash jáne Túrkıa qalalaryndaǵy gýbernatorlar men ákimder, Túrki elderiniń ókilderi men Maǵjan Jumabaev  týǵan Soltústik Qazaqstan oblysynyń mádenıet qyzmetkerleri jáne qazaqstandyq aqyn-jazýshylar qatysty.

Týǵanyna 125 jyl tolǵan aıbyndy aqyndy bir mınýttyq únsizdikpen eske alǵan Túrki jurty onyń ǵumyry men shyǵarmalarynan syr sherter beınefılmdi jáne Soltústik Qazaqstan oblysy ónerpazdary daıyndaǵan konserttik baǵdarlamany tamashalady. Sondaı-aq Túrkıanyń Mádenıet jáne týrızm mınıstriniń orynbasary Hýseın Iaıman Maǵjan Jumabaevtyń óleńderin jatqa oqyp, kóptiń qurmetine bólendi. Aıta keterligi, Maǵjan óleńderi túrik tiline aýdarylyp, kitap bolyp basylyp shyqqan.

«Ataýly jyl aıasynda jeltoqsan aıyna deıin kóptegen is-sharalar men túrli kezdesýler ótkiziletin bolady. Maǵjan Jumabaev jylyna arnalǵan arnaıy baǵdarlamalar tek Kastamoný qalasynda ǵana emes, Túrkıaǵa qarasty basqa qalalarda da uıymdastyrylady» – deıdi TÚRKSOI uıymynyń bas hatshysy Dúısen Qaseıinov.

Esterińizge sala ketsek, TÚRKSOI-ǵa múshe elderdiń Mádenıet mınıstrleriniń Túrkistan qalasynda ótken HHHV Turaqty Keńesi otyrysynda Túrki elderiniń 2018 jylǵy mádenı astanasy dep Kastamoný qalasy bekitilgen bolatyn. Osy oraıda, 50-den asa is-sharalardy ótkizý josparǵa alynǵan. Maǵjan Jumabaevty eske alyp, túrkitildes elder arasynda keńinen nasıhattaýǵa arnalǵan is-shara 19-shy aqpan kúni Ankara qalasynda jalǵasady. Al 21 naýryz kúni «Kastamoný – Túrki áleminiń mádenı astanasy» jylynyń saltanatty ashylýy ótedi.