TÚRKSOI Halyqaralyq uıymynyń dástúrli "Baspasóz syılyǵy" tabystaldy, dep jazady Qamshy.kz aqparat agenttigi.

Túrkıanyń Kastamoný qalasynda TÚRKSOI-ǵa múshe elder ókilderiniń qatysýymen 2017 jyldy qorytyndylaý jıyny ótti. TÚRKSOI halyqaralyq uıymy uıymdastyrǵan saltanatty sharada túrkitildes elderdiń rýhanı ómirine úles qosqan birqatar azamattarǵa úzdikter premıasy tabystaldy.
Mártebeli jıynǵa TÚRKSOI uıymynyń bas hatshysy Dúısen Qaseıinov, Túrkıanyń Mádenıet jáne týrızm mınıstriniń orynbasary Hýseın Iaıman, Kastamoný qalasynyń gýbernatory Iashar Karadenız, Kastamoný qalasynyń basshysy Tahsın Babash jáne Túrkıanyń birqatar qalalaryndaǵy gýbernatorlar men ákimderi, Túrki elderiniń ókilderi qatysty.

Osy oraıda 2017 jylǵy  "Túrkistan-Túrki áleminiń mádenı astanasy" jobasyn nasıhattaýǵa erekshe úles qosqan Qazaqstan, Qyrǵyzstan, Tatarstan, Bashqurtstan, Gagaýzıa jáne Soltústik Kıpr, Bolgarıa, Makedonıa, Túrkıa elderiniń aqyn-jazýshylary men jýrnalıserine TÚRKSOI-dyń dástúrli «Baspasóz syılyǵy» berildi.

Sondaı-aq, Túrki elderine ortaq mańyzdy is-sharalardy keńinen nasıhattaýda aıryqsha úles qosqany úshin bizdiń elimizden Ońtústik Qazaqstan oblysynyń Mádenıet jáne tilderdi damytý basqarmasy, oblystyq mádenıet jáne halyq shyǵarmashylyǵy ortalyǵynyń redaktory Madına Aıtpenbetova men «Kazınform» Halyqaralyq Aqparattyq agenttiginiń redaktory Janar Muhamedıarova da bar.