Aqmola oblysynda kámelettik jasqa tolmaǵan mektep oqýshysyn soqqyǵa jyǵyp, es-túzsiz aýrýhanadan biraq shyǵarǵan Qorǵaljyn aýyldyq okrýginiń ákimi Janat Omarovtyń isine qatysty tártiptik keńestiń otyrysy bolyp ótti, dep habarlaıdy QazAqparat tilshisi.

Eske sala keteıik, osyǵan deıin habarlaǵanymyzdaı, Qorǵaljyn aýdanynyń turǵyny Aıgúl Bekjanova Feısbýk áleýmettik jelisine A.Tóleýbaev atyndaǵy orta mektepte oqıtyn uly, 8-synyp oqýshysy Dıas Muqandy Qorǵaljyn aýyldyq okrýginiń ákimi Janat Omarov soqqyǵa jyqqandyǵy týraly jazǵan bolatyn.

Onda zardap shekken balanyń anasy ulynyń «mıdyń shaıqalýy» dıagnozymen Qorǵaljyn aýdandyq aýrhanasyna, keıin Astana qalasyndaǵy №2 aýrýhanasyna jetkizip, neırohırýrgıa bólimshesinde jatqanyn aıtqan edi. Bul jazba kópshilik arasynda narazylyq týdyryp, áleýmettik jeli qoldanýshylary oqýshyǵa qol kótergen ákimniń isin qatań synǵa aldy. 

QR Bas prokýratýrasynyń baspasóz qyzmeti Muqan Dıastyń densaýlyǵyna zıan keltirý faktisi boıynsha Qorǵaljyn aýdandyq ishki ister bólimimen qylmystyq is qozǵalyp, tergelip jatqanyn atap ótti. Búgin osy oqıǵaǵa sebepker Qorǵaljyn aýyldyq okrýginiń ákimi Janat Omarovtyń isine qatysty Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamenti Ádep jónindegi keńesiniń kezekten tys otyrysy ótti.

Keńes músheleri QR Memlekettik qyzmet týraly Zańynyń 10 babynyń  8 bólimshesi, 49 babynyń 1 bóligi 3, 4, 7  bólimsheleri, Ádep jónindegi Kodekstiń 5 bóligi 2, 7, 13 jáne  7 bóligi 1 bólimshesi boıynsha aıyptalǵan Qorǵaljyn aýyldyq okrýginiń ákimi, memlekettik qyzmetshi Janat Omarovty qyzmetinen bosatý týraly biraýyzdan sheshim shyǵardy.