Ulttyq gvardıanyń áskerı qyzmetshileri seısenbi kúni keshke Almaty oblysynyń Uzynaǵash aýylyndaǵy sý basqan úılerdiń turǵyndaryn qaýipsiz jerge kóshirdi, dep habarlaıdy Sputnik Qazaqstan.

Almaty oblysynyń bes aýdany men Taldyqorǵan qalasyndaǵy úılerdi birneshe kúnnen beri erigen qar sýy basyp jatyr. Aýdan bıligi jergilikti aýqymda TJ rejımin jarıalap, áskerılerdi kómekke shaqyrdy.

"Saǵat 20:00 shamasynda jeke quramnyń kúshimen Qonaev kóshesindegi úsh úıdiń turǵyndary kóshirildi. Apattan qutqarý jumystaryn júrgizýge 90-nan astam áskerı qyzmetker jáne 10 tehnıka bólindi", — dep jazylǵan Ulttyq gvardıanyń habarlamasynda.

Ulttyq gvardıanyń áskerı qyzmetkerleri aýyldaǵy jumysty jalǵastyrýda: aryqtardy tazalap, qum salynǵan qaptardan bóget jasap, aýyl turǵyndaryna úıdiń aýlasynan erigen qar sýyn shyǵarýǵa kómektestip jatyr.