5 qańtardan beri Astana qalasyndaǵy tergeý ızolátorlarynyń birinde qamaýda otyrǵan Kara Ozan Kadır esimdi túrik azamatynyń advokaty Iýlıa Shakır Túrkıanyń Qazaqstandaǵy elshiligine ashýly ekenin bildirdi, dep jazady Qamshy.kz aqparat agenttigi Kazaknews.kz saıtyna silteme jasaı otyryp.

Kazakistan.kz aqparat agenttiginiń tilshilerimen kezdesken Iýlıa Shakır qorǵalýshysynyń isin 18 qańtardan beri júrgizip kele jatqanyn aıtty. Erejelerge sáıkes bul sot isi jaıynda málimet bere almaıtynyn jetkizgen Iý.Shakır tergeý jumystarynyń ádil júrgizilýi úshin kóptegen ınstansıalarǵa júginip, ábden taban tozdyrǵanyn jetkizdi.

K.O.Kadırdiń quqyǵyn qorǵaý nıetimen birden Túrkıa elshiligine habar bergen advokat túrik dıplomatıalyq ókildigi tarapynan Túrkıa azamatyna qandaıda bir kómek kórsetiledi dep kútken. Qorǵaýshynyń aıtýynsha, óz praktıkasynda shetel azamattary isti bolǵanda sol eldiń elshilikteri barlyq proseske belsene qatysyp, qorǵalýshylaryna bastan aıaq qoldaý kórsetedi. Al túrik elshiligi isti bolǵan otandastaryna nemquraıly qarap keledi.

K.O.Kadırdiń isin qolǵa alǵaly Iýlıa Shakır elshilikke qońyraý shalýyn údetip damyl bermese de, Astanadaǵy konsýldyq bylq etpegen. Elshilik ókilderi advokattyń máselege qatysty hatyn qabyldamaı, ábden álek qylǵan. Iý.Shakır uzyn sonar qońyraýlardan keıin baryp elshilikke hatyn tabystaǵan, onyń ózinde de Túrkıanyń Qazaqstandaǵy elshiligi hattyń kiris nómirin bermegen, ıaǵnı hatty tirkeýge almaǵan.

-TÚRİK ELSHİMEN KEZDESE ALMAǴAN ADVOKAT TÚRKIA SYRTQY İSTER MINISTRLİGİNE DE HAT JAZǴAN

Túrik elshisi Nevzat Ýıanykpen kezdeskisi kelgenin málimdegen K.O.Kadırdiń advokaty bul bastamasynyń da jaýapsyz qalǵanyn aıtady. Elshilik ókilderi advokattyń aýzyn qý shóppen súrtken: N.Ýıanyk birde bos emes bolsa, birde jumys ornynan tabylmaǵan.

Iýlıa Shakır, sonymen qatar, Túrkıanyń Syrtqy ister mınıstrligine resmı feısbýk paraqshasy arqyly hat jazǵan. Qyrsyqqanda olar da jym-jyrt.

-TÚRİK ELSHİLİGİ QAZAQSTANǴA NOTA JİBERMEK BOLǴAN..

Iýlıa Shakır aqpan aıynyń orta kezinde túrik elshiliginen ózin «sekretarmyn» dep tanystyrǵan bireý habarlasyp, K.O.Kadırdiń isinen elshiliktiń habary bar ekenin málimdeı kele, Qazaqstan Syrtqy ister mınıstrligine tıisti nota jiberiledi dep sendirgen. Advokattyń topshylaýynsha, dıplomatıalyq notanyn jiberilip jiberilmegenin tekserý túrik elshiliginen habar alynbaýyna baılanysty múmkin emes.

-KARA OZAN KADIRDİ QAMAQQA ALǴAN TERGEÝSHİ İSTEN SHETTETİLDİ

Astana advokattar kollegıasynyń múshesi Iýlıa Shakır Kara Ozan Kadırdiń isinde ilgerileýdiń bolǵanyn aıtady. Iý.Shakırdiń aıtýynsha, tergeý jumysyn júrgizgen tergeýshi qylmystyq isti asharda zańsyz áreketterge barǵan. Osy jaıttar ashyqqa shyǵyp, ádildikten attaǵany belgili bolǵan tergeýshi bul isten shettetilgen. Iý.Shakırdiń paıymdaýynsha, mindetin jaýapsyz atqarǵan osy tergeýshiniń kesirinen qorǵalýshysy osy ýaqytqa sheıin tutqynda otyr.

-IZOLÁTORDA OTYRǴAN KARA OZAN KADIR ÁLEÝMETTİK OQSHAÝLAÝDA

Iýlıa Shakır eki aı boıy tergeý ızolátorynda otyrǵan qorǵalýshysynyń hal-jaǵdaıy týraly da áńgimelep berdi. Iý.Shakırdiń aıtýynsha, Kara Ozan Kadır ońasha kamerada emes, ızolátorda kópshilikpen birge otyrsa da, qazaq nemese orys tilderin bilmeýine baılanysty oqshaýlaýda. Janyndaǵy aıyptalýshylar men baqylaýshy qyzmetkerlermen ym-ısharamen ǵana túsinisedi. Mysalǵa, Iý.Shakır osy isti qabyldaǵan kezde qorǵalýshysy tumaýratyp aýyrǵan, alaıda tildik kederginiń kesirinen medısınalyq kómek qabyldaı almaǵan. Advokat bul jaıtty da elshilikke jetkizgenin, biraq olardyń selsoq qaraǵanyn aıtyp nalıdy. Aqyrynda K.O.Kadırge em-dom sharalarynyń kórsetilýine qorǵaýshylary túrtki bolǵan.

Túrik azamaty osy ýaqytqa sheıin advokattar men aýdarmashydan basqa eshkimmen kezdespegen. Jaqyndary men týystary Túrkıada, al aýyr qylmys boıynsha aıyptalýyna baılanysty ózge azamattarmen kezdesýine tıisti pármensiz ruqsat etilmeıdi. Zań boıynsha, dıplomatıalyq pasport ıeleriniń aıyptalýshymen júzdesýine bolady. Alaıda, joǵaryda aıtylǵandaı, elshilik qyzmetkerleri otandastarynyń qal-jaǵdaıyn bilýge bas suqpaǵan.

K.O.Kadırdiń advokaty sóziniń sońynda sot isin júrgizýshi tergeýshiniń ádiletsizdigi men túrik elshiliginiń nemquraılylyǵynyń arasynda ortada qalǵanyn málimdedi. Iý.Shakır qorǵalýshysynyń aqtalýyn jedeldetý úshin sharasyzdyqtan Elbasy Nursultan Ábishulyna hat jazǵanyn jetkizdi.