QR Mádenıet jáne sport mınıstri Arystanbek Muhamedıuly Naýryz meıramyn jańa úlgide toılaý jóninde «Egemen Qazaqstan» gazetine suhbat bergen bolatyn. Mınıstr Naýryzǵa qajet irgeli izdenisterge toqtalyp, ótkizilýge tıis tarıhı ári zamanaýı sharalardy birneshe tarmaqqa bólip kórsetken edi. Bul usynysqa elimizdegi qoǵam qaıratkerleri ún qosyp jatyr.
Ermahan Ybyraıymuly, Bokstan Olımpıadalyq daıarlaý Ortalyǵynyń dırektory:
- Naýryz merekesi qazaq halqy úshin óte kıeli sanalady. Tabıǵattyń tirilip, jańa jyldyń bastalatyn ýaqyty. Naýryz merekesi elimizde keń kólemde atalyp ótiledi. Keńes Odaǵy kezinde umytyla bastaǵan meıramymyzdy Elbasy Nursultan Ábishuly jandandyrdy. Osy oraıda Qazaqstan Respýblıkasynyń Mádenıet jáne sport mınıstri Arystanbek Muhamedıulynyń Naýryz meıramyna qatysty jaqynda ǵana Egemen Qazaqstan gazetine bergen maqalasyndaǵy aıtqan pikirine tolyqtaı qosylamyn. Mınıstr Naýryzdy toılaýdy naýryz aıynyń basynan bastaý kerek degen jaqsy oı tastady. Ony Almaty qalasy qoldap áketti. Osylaısha, basqa da óńirlerge kezek beriledi. Sonymen qatar, naýryzdy jergilikti jerdiń meıramy retindegi pozısıasyn keńeıtý qajet degen oıy da maǵan unady. Bul birinshiden, túrki álemine ortaq meıramdy bir atanyń balalaryndaı toılaý bolsa, ekinshiden, elimizdi Batys álemine basqa qyrymyzdan tanytý. Naýryz meıramyn umytpaı, ony Táýelsizdik kúninen keıingi taǵy bir basty mereke etý qajet sekildi.
Nurjan Janpeıisov, T. Júrgenov atyndaǵy QazUÓA-nyń «Dástúrli mýzykalyq óner» kafedrasynyń ustazy:
- Baýyrsaq, naýryz kóje men palaýdy tegin taratý kerek. Sońǵy jyldary ol jurttyń bıznesine aınalyp ketti. Balalarǵa barynsha, birneshe jerden ónerlerin kórsetýge múmkindik jasaý kerek. Bir alańnyń ózinde birneshe jerden uıymdastyryp jáne olarǵa jeńil-jelpi syılyqtar berýgen durys. Qymbat qajet emes, bıyl qymbat berseń endigi, onyń arǵy jyly da solaı isteýge týra keledi. Sondyqtan arzan jáne bárine jetetindeı bolǵany jón. Sonda balalar qyzyǵa túsedi. Orystar, tb ózge ult ókilderi de barý yntalaný úshin barlyq adamǵa qyzyqty ári paıdaly, úırenetin jáne oljaly qaıtatyndaı ótkizgen abzal. Brazılıa, t.b. elderdiń karnavaly sıaqty kósheden syrnaılatyp-kerneıletip, kóńildi mýzykamen qarap turǵan adamdardyń ózi bılep, qosylyp ere ketetindeı sherý ótkeni de jaqsy bolar edi, úıde otyrǵan adamnyń ózi estip dúr silkinetindeı. Jeke adamdar qolóner buıymdaryn alyp shyǵyp satyp jatsa ıgi bolar edi. Bul úrdis jastarǵa da, úlkenderge de kez kelgen kóshede otyryp tynystaýyna jáne sonymen qatar naýryz merekesin kórip, sezip otyrýǵa qol jetimdi múmkindik týǵyzylsa nur ústine nur bolar edi.
