T. Júrgenov atyndaǵy Qazaq Ulttyq óner akademıasy men «Kenen Ázirbaev atyndaǵy komersıalyq emes qory» 15-20 jas aralyǵyndaǵy jasóspirimder arasynda «Jas ekpin» baıqaýyn ótkizedi. Búgin soǵan arnalǵan baspasóz konferensıasy boldy, dep jazady Qamshy.kz aqparat agenttigi.
Konferensıaǵa Qazaqstannyń eńbek sińirgen ártisi, «Dástúrli mýzykalyq óner» kafedrasynyń meńgerýshisi Ramazan Stamǵazıev, «Dástúrli mýzykalyq óner» kafedrasynyń dosenti Murat Ábýǵazy, Kenen ánderiniń nasıhatshysy, «Dástúrli mýzykalyq óner» kafedrasynyń ustazy Sholpan Darjanova men «Kenen Ázirbaev atyndaǵy komersıalyq emes qorynyń» dırektory Ázirbaev Muhıt Baqytuly, Kenen Ázirbaevtyń qyzy Tórtken Ázirbaeva qatysty.
– Qazaq dalasynda ǵasyrdan-ǵasyrǵa kele jatqan ulttyq ónerimiz bar. Onyń ishinde án dástúri men kúı dástúrin aýyz toltyryp aıtýǵa bolady. Halyq aspaptary – dáripteýge turarlyq qundylyq. Án menen kúıdiń kókparynda qaınap, qazaq dalasyndaǵy óner mektepteriniń pushpaǵyn ılep júrgen jas býyndardy jınap, osy baıqaýdy ótkizsek degen armanymyz boldy. 2018 jyldyń 15-16 naýryzynda alystan at shaptyryp keletin jastardyń dodasyn óz kózimizben kórsek degen oıymyz bar. Baıqaýdy ótkizýge altyn kópir bolyp, «Kenen Ázirbaev atyndaǵy komersıalyq emes qory» qarjylyq qoldaý kórsetip otyr, - dep aıtyp ótti Ramazan Stamǵazıev.
Baıqaýǵa mýzykalyq orta oqý oryndarynyń stýdentteri men arnaıy mamandandyrylǵan mýzyka mektepteriniń 11-12-synyp oqýshylary qatysady. Baıqaý «Dástúrli án» jáne «Dástúrli kúı» eki nomınasıalary boıynsha ótedi.
«Jas ekpin» baıqaýy ǵasyrlar boıy urpaqtan urpaqqa amanat mura bolyp jetken halqymyzdyń dástúrli án-kúı salasyndaǵy asyl qazynasyn jan-jaqty nasıhattaý, jas urpaqty búgingi kúnniń talabyna saı tárbıeleýdi maqsat tutady.
