QR Ulttyq qaýipsizdik komıteti tóraǵasynyń orynbasary general-maıor Nurǵalı Bilisbekov 2018–2022 jyldarǵa arnalǵan baǵdarlamanyń maqsaty — dinı ekstremızm kórinisterin eskertý jáne terorızm qaýpin boldyrmaý arqyly adamnyń, qoǵamnyń jáne memlekettiń qaýipsizdigin qamtamasyz etý ekenin atap ótti.
«Halyqaralyq terorıstik uıymdar Sırıa men Irakta jeńilis tapty. Sondyqtan ol jerdegi sodyrlar otbasylarymen birge basqa jerge, sonyń ishinde óz elderine qonys aýdaryp jatyr. Qazirgi kezde Qazaqstanǵa 125 azamat qaıta oralyp, olardyń 57-si sottaldy. Elge oralǵandar radıkaldyq kózqarasty ustanady. Olarmen profılaktıka men beıimdeý jumystary júrgizilýde», — dedi QR Ulttyq qaýipsizdik komıteti tóraǵasynyń orynbasary Nurǵalı Bilisbekov.
2013 jyldan bastap elimizde dinı ekstremızm men terorızm ıdeologıasyn taratýdyń sebepteri men jaǵdaılaryn joıý jáne ataýly aqparattyq túsindirý jumystaryn uıymdastyrý jóninde 202 komısıa jumys isteıdi.
Málimdelgen aqparatqa sáıkes, atalǵan baǵytta jalpy sany 8,1 mln-nan astam adam qamtylǵan 96,6 myńnan astam shara ótkizildi.
Al QR Terorızmge qarsy ortalyǵy shtabynyń bastyǵy Janat Saıpoldaev Sırıa-Irak aımaǵynan 125 qazaqstandyq oralǵanyn, onyń ishinde 40-tan astamy balalar ekenin aıtty.
