Elbasy birlesken otyrys barysynda halyqqa arnalǵan «Prezıdenttiń bes áleýmettik bastamasy» atty úndeýin jarıalady. Onda árbir otbasyna baspana alýdyń jańa múmkindikterin berý, jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtý, joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý, shaǵyn nesıe kólemin kóbeıtý, sondaı-aq eldi gazben qamtamasyz etý isin jalǵastyrý jónindegi bastamalar qamtylǵan.

Nursultan Nazarbaev jańa áleýmettik bastamalar qoǵamymyzdyń áleýmettik birligin nyǵaıtýǵa jáne árbir qazaqstandyqtyń ál-aýqatyn ári qaraı jaqsarta túsýge baǵyttalǵanyn atap ótti.

– Biz búgin áleýmettik jańǵyrý jolynda jańa, aýqymdy qadam jasaýǵa daıynbyz. Bul – eldiń ıgiligine arnalǵan utymdy, sonymen qatar, optımısik joba. Órkendegen Qazaqstan – bul, eń aldymen, memleketi ózin qorǵap, qoldaıtynyn, qamqorlyq jasaıtynyn sezinetin, tıisinshe elin jan júregimen súıetin, patrıottyq tanytatyn ózderine senimdi adamdardyń mekeni dep sanaımyn, – dedi Qazaqstan Prezıdenti.