11 sáýir kúni Oral qalasynda «ÓRKENIET: JAIYK SMART IDEAS CLUB» beıresmı zıatkerlik alańy ótti dep habarlaıdy Qamshy.kz aqparat agenttigi.

Atalǵan shara Elbasy N.Á.Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynyń jaryq kórgenine 1 jyl tolýy qarsańynda uıymdastyrylyp, baǵdarlamada aıtylǵan negizgi ıdeıalar qoǵam ókilderiniń qatysýymen keńinen talqyǵa salyndy.

Ashyq formatta ótkizilgen zıatkerlik alańǵa Batys Qazaqstan oblysy ákiminiń orynbasary Ǵ.Ospanqulov, spıkerler men sarapshy mamandar, bastamashyl jastar ókilderi qatysty.

Sharanyń alǵashqy spıkeri – ekonomıka ǵylymdarynyń doktory, profesor, «Rýhanı jańǵyrý» baǵdarlamasynyń basty baǵyttaryn jáne jańa bastamalardyń iske asyrylýyna  atsalysyp júrgen kásipker Lılıa Mergalıeva bilim berý isimen qosa bıznesti alyp júrýdiń qyr-syrymen bólisti.

Alańnyń jas, ári kreatıvti spıkeri - «Bolashaq» Halyqaralyq baǵdarlamasy boıynsha Nú-Iork Kıno Akademıasynyń túlegi – Baqyt Qader «Bolashaq» baǵdarlamasynyń jastarǵa berilgen zor múmkindik ekenin aıta otyra, jetistikke jetýge tabandylyq pen jańashyldyqtyń qajet ekendigin baıqatyp, bolashaq josparlaryn alǵa tartty.

Oral qalasyndaǵy búgingi tańda qala jastarynyń kóshe bıine degen qyzyǵýshylyǵy úlken. Tanymal «Urban Style» bı qozǵalysynyń jetekshisi Asan Samatovtyń aıtýynsha  Asan Oral qalasynda «break» bı túrin meıilinshe damytyp, jastardy salaýatty ómir saltyna jetelegisi keletin pikirin aıtty. Al, dástúrli jáne zamanaýı ónerdi ushtastyryp júrgen Danıar Rahmetjanov «DIDI RECORDS» dybys jazý stýdıasynda kóptegen jastarǵa demeý berip,  sońǵy hıt paradtaǵy «07 Aımaq», «Samaıa vyshka» sekildi kóptegen hıt ánderdi jazǵan.

29 jastaǵy Asqat Ramazanovtyń bıznes salasynda jetken jetistigi men tájirıbesi óte kóp, onyń jastarǵa aıtary da kóp. «Fiesta» dúkender jelisin óz qarjysyna – 700 myń teńge alǵashqy jarnamen bastaǵan ol qazirgi taza tabysy – 900 mln. teńgeni  quraǵan. Búginde ol kásipkerlikten bólek Oral qalasyn áleýmettendirý boıynsha da úlken jobalar qolǵa alýda.