Dılnaz Ábishevanyń óliminiń naqty sebebi 27 sáýirde belgili bolady.

Aqtóbede sabaq ústinde jaǵdaıy nasharlap qaıtys bolǵan 5-synyp oqýshysyna qatysty dárigerler túsinikteme berdi.

«Oqıǵa 10 sáýirde boldy. 11 jastaǵy qyzdyń sabaq ústinde nasharlap ketken. «Qyz esinen tanyp qaldy» dep jedel járdem shaqyryldy. Standartqa sáıkes esinen taný shaqyrýdyń ekinshi kategorıasyna jatady ári jedel járdem 15 mınýtta jetýi tıis. Oqıǵa ornyna jedel járdem kólik 14 mınýtta jetti. Alaıda qyz ol ýaqytqa deıin kóz jumǵan», - dedi Aqtóbe oblystyq densaýlyq saqtaý basqarmasy basshysynyń orynbasary Svetlana Esenamanova.

Esenamanovanyń aıtýynsha, jedel járdem jetpes buryn alǵashqy kómek kórsetý kýrsynan ótken medbıke kardıomedısınalyq kómek kórsetken. Sol ýaqytta jetken medbıkeler de qyzdyń ómiri úshin jantalasady, alaıda nátıjesiz boldy.

«Medısınalyq ekspertızanyń aldyn ala dıagnozy boıynsha, qyzdyń júregi toqtap qalǵan. Mundaı jaǵdaılar úlkendermen qosa balalar arasynda da jylyna bir-eki ret bolyp turady. Qyzdyń deni saý bolǵan, júrek talmasy da bolmaǵan. Kóktemde ótken medısınalyq tekserý kezinde de densaýlyǵy qalypty boldy», - dedi basqarma basshysynyń orynbasary.

Buǵan qosa muǵalimderdiń «jedel járdemge 18 ret habarlasyp, kelmegen soń jedel járdem kóligin joldan toqtatyp aldyq» degen derekterin joqqa shyǵardy.