KHDR men Ońtústik Koreıa bir-birine qarsy qurlyqta, teńizde jáne áýede qaqtyǵysýǵa sebep bolatyn jaýlastyqty joıady. Bul týraly eki el basshylary qatysqan samıt qorytyndysy boıynsha birigip jazylǵan deklarasıada aıtylǵan. Qujatta kórsetilgendeı, Ońtústik pen Soltústik Koreı túbegindegi áskerı qysymdy túsirýge jáne soǵys qaýpin tómendetýge birigip áreket etedi.
Ótken jumada Kım Chen Yn demarkasıalyq aýmaq arqyly Ońtústik Koreıaǵa aıaq basqan KHDR-diń alǵashqy basshysy boldy. Demılıtarızasıalyq aýmaqta ol Ońtústik Koreıa basshysy Mýn Chje Inmen kezdesti. Eki eldiń basshylarynyń kezdesýi álem úshin úlken tarıhı oqıǵa boldy.
KHDR men Koreıa Respýblıkasy arasyndaǵy geografıalyq syzyq 1948 jyly eki eldi bólip turatyn shekaraǵa aınaldy. Sol jyldardan beri memleketter bir-birine jaý sanalyp ári biriniń turǵyny ekinshisiniń shekarasynan asyp óte almaǵan.
Endigi eki el arasyndaǵy qaýipti ári erekshe shekara jaıly qyzyqty derekterdi nazarlaryńyzǵa usynamyz.
1.Qarýsyzdandyrý aımaǵynda álemdegi eń qaýipti gólf alańy bar. Gólf doptarynyń sondaǵy mınaly aımaqtarǵa qaraı ushyp ketýi ábden múmkin.
Gólf alańy BUU-nyń bazalyq kúshteri shoǵyrlanǵan aımaqta ornalasqan. Nebári úsh qýysy bar gólf alańynyń jan-jaǵy mınalarmen qorshalǵan.
2.Adamdary sırek qarýsyzdandyrý aımaǵy jabaıy tabıǵat úshin qolaıly. Onda jabaıy ańdar men sırek kezdesetin qustar ómir súredi.
Qarýsyzdandyrý aımaǵynyń uzyndyǵy 148 shaqyrym, eni 4 shaqyrymǵa deıin sozylyp jatyr. Ol aımaqqa ótýge qatań tyıym salynǵan. Sonyń arqasynda ańdar men qustardyń erkin shoǵyrlanýyna eshkim bóget keltirmeıdi.
Onda sırek kezdesetin japon tyrnalardy, gımalaı aıýlary men buǵylaryn jáne jolbarystardy kezdestirýge bolady. Alaıda mınaly aımaq bolǵandyqtan ańdardyń da ómirine qaýip tónip tur. Al ólip jatqan ańdardyń sanyn eshkim anyqtamaıdy.
3.Qarýsyzdandyrý aımaǵynda dıversıa men kontrabandany jetkizý úshin tonnel qazylǵan.
Soltústik koreıalyqtar iri tonnelderdi soǵys bola qalǵan ýaqytta Ońtústik Koreıaǵa jyldam shyǵý maqsatynda qazǵan. Tonneldiń biri Seýlge 32 shaqyrym jetpeı aıaqtalady. Alaıda Phenán tarapy tonnelderdiń soǵys maqsatynda salynǵanyn jasyryp otyr. Kontrabandalyq maqsat ta baıqalmaıdy. Qazirgi ýaqytta ondaǵy tonnelder týrıserge arnalǵan kórneki jerge jáne eki el arasyndaǵy qaqtyǵystyń sımvolyna aınaldy.
4.Ońtsútik Koreıa demılıtarızasıalyq aımaqqa shoǵyrlanǵan fermerlerdi salyqtan bosatady.
Qarýsyzdandyrý aımaǵynyń Ońtústik Koreıaǵa qaraǵan tusynda kúrish ósiretin fermalar bar. Onda ornalasý úshin talap ta joǵary. Koreıa soǵysyna deıin bul aımaqtarda fermerlerdiń jaqyn týystary turǵan bolýy kerek.
Aımaqty BUU basqarǵandyqtan turǵyndar salyq tólemeıdi, al jastardy áskerge shaqyrmaıdy.
