QR Aqparat jáne komýnıkasıa mınıstri Dáýren Abaev Astananyń týǵan kúnine oraı jumsalmaq qarajat pen óńirlerdiń bas qalaǵa jasaǵan syılary týraly pikir bildirdi.

«Óńirlerdiń Astanaǵa tartýlary jaıly suraqty basqasha qoıyp kórsek?! Samal yqsham aýdany men saıabaq aralyǵynda salynyp jatqan velojúrginshilerge arnalǵan kópir qala ákimdigi úshin salynyp jatqan joq! Onyń bári turǵyndar men qala qonaqtary úshin, balalar úshin», - dedi Abaev.

Mınıstrdiń sózine sensek, bas qalanyń týǵan kúninen soń merekege oraı jumsalǵan aqshany turǵyndar umytady, esesine sol aqshaǵa salynǵan qurylystyń paıdasyna keneledi.

«Biz basty nazardy tek aqshaǵa aýdaryp úırengenbiz. Sol aqshaǵa salynǵan qurylystyń nátıjesin eshkim aıtpaıdy. Infraqurylym qalady, qala damıdy. Munyń bári turǵyndar men qala qonaqtary úshin. Aqshanyń bári salyq túrinde álde basqa jolmen memleket qazynasyna qaıtarylady», - dedi mınıstr.

Buǵan qosa mereıtoıǵa bólingen qarajat ta sóz boldy. Abaevtyń aıtýynsha, qarajattyń qaıda, qalaı ketip jatqany arnaıy tekserý organdarynyń baqylaýynda.

Aıta keteıik, Qazaqstan bıligi Astana qalasynyń 20 jyldyǵyna oraı júz túrli shara uıymdastyrylady dep josparlandy. Soǵan oraı memleket qazynasynan 19 mlrd teńge bólinbek.

Astananyń 20 jyldyq mereıtoıyn toılaý úshin respýblıkalyq búdjetten 18,8 mıllıard teńge bólý kózdelgen. Bul týraly mádenıet jáne sport vıse-mınıstri Sáken Musaıbekov málimdegen.

«20 jyldyqty toılaý aıasynda ótkiziletin 85 sharaǵa barlyǵy 18 mıllıard 800 mıllıon teńge qarastyrylǵan. Bizdi qarjy mınıstrligi qoldap otyr jáne bul qarajat búdjette josparlanǵan. Bul sharalardy joǵary deńgeıde ótkizemiz dep senemin», –dedi Sáken Musaıbekov sársenbi kúni 2018-2020 jyldarǵa arnalǵan búdjettiń tanystyrylymy kezinde.

Buǵan qosa qarjy mınıstri Baqyt Sultanov bul sharalar bir jyl boıy ótkiziletinin atap ótti.

«Sharalardy jyl boıy ótkizý týraly tapsyrma bar. Oǵan eldiń barlyq aımaqtary qatysady», – dedi ol.

Aıta keteıik, Qazaqstanda Astana kúni 6 shildede atalyp ótedi.