Ózbekstan basshysy Shavkat Mırzıeev resmı saparmen AQSH-ta júr. 

Shavkat Mırzıeev pen jubaıy «Endrús» áýejaıyndaǵy ushaqtan túsken boıda gúl shoqtaryn ustaǵan amerıkalyq oqýshylar basshyny ózbek tilinde qarsy aldy. Shavkat Mırzıeevti qarsy alý úshin AQSH úkimeti de áýejaıǵa arnaıy barǵan.

Tramp úshin mártebe

Al AQSH basshysymen Mırzıeev kelesi kúni kezdesti. Qonaqtaryn qarsy alǵan Tramp «AQSH úshin Ózbekstan qashan da mańyzdy orynda» dep atap ótti.

«Sizben Aq úıde kezdesý – biz úshin mártebe», - degen edi Tramp.

Óz kezeginde Shavkat Mırzıeev ózin joǵary deńgeıde qarsy alǵan Trampqa alǵysyn bildirip, AQSH-tyń Ózbekstandy qoldaıtynyn rızashylyqpen qabyldaǵan.

«Ózbekstan men AQSH-taǵy prezıdent saılaýlarynan keıin eki memlekettiń qarym-qatynasy jańa deńgeıge kóterildi. «Ózbekstan men AQSH: strategıalyq seriktestiktiń jańa dáýiri» degen ataýdan-aq bárin uǵynýǵa bolady. Eki el jańa belesterge kóz tikti», - dedi Mırzıeev.

Buǵan deıin qos prezıdent Er-Rıad pen Nú-Iorkte kezdesken. Al Aq úıde birinshi ret kezdesti.

AQSH qoldaýy

Amerıka basshysy Tashkent uıymdastyrǵan ekonomıkalyq jáne qoǵamdyq-saıası reformalardy joǵary baǵalap, onyń júzege asýy úshin qol ushyn sozatynyn málimdedi.

Buǵan qosa taraptar óńirlik qaýipsizdik jáne terorızmmen kúres  máselelerin talqyǵa saldy.

Tramp Shavkat Mırzıeevtiń Ortalyq Azıada bastaǵan ıntegrasıalyq úrdisin qoldap, «S5+1» formatynda eldermen dıalogqa ótýge qashan da daıyn ekenin jetkizdi.

Sonymen qatar AQSH Aýǵanstandaǵy ózbek temirjoldary men ınfra qurylys salasynda saıası jáne qosymsha kómek kórsetýge daıyn. Óz kezeginde Shavkat Mırzıeev te aldaǵy ýaqyttarda kez-kelgen kómegin usynýǵa daıyn ekenin jetkizdi.

AQSH pen Ózbekstan qorǵanys salasyndaǵy seriktestikti nyǵaıtyp, alǵashqy bes jyldyq áskerı árekettesý josparyn júzege asyrmaq.

Basshylar Ózbekstandaǵy adam quqyqtary máselesin de shetin qaldyrǵan joq. Tramp Tashkenttiń azamattardyń quqyǵyn qorǵaý máselesindegi ádilettilik reformasyn maquldady.

Ózbekstan eldegi amerıkalyq kompanıalardaǵy jumysshylardyń jaǵdaıyn jaqsartyp, jiti baqylaýda ustaıtyndyǵyn málim etti. Basshylar aýyl sharýashylyǵy, ekonomıka, energetıka, hımıa, qarjy, týrızm, mata óndirisi, densaýlyq saqtaý jáne sıfrlyq tehnologıa salalarynda seriktestikti odan ári nyǵaıtý múmkindikterin qaıta qaraýǵa kelisti.

Sapar barysynda Ózbekstan men AQSH kompanıalary 20 shaqty iri  kelisimshartqa qol qoıdy.  Olardyń júzege tolyq asýy 4,8 mlrd dollarǵa baǵalandy.

Buǵan qosa Tramp Ózbekstannyń búkilálemdik saýda uıymyna kirýine septeseinin jetkizdi.