Astanada «TMD Arýy - 2018» xalyqaralyq baıqaýy ótti. Qazaqstannyń namysyn úsh qyz qorǵady, dep xabarlaıdy QazAqparat.

Jalpy, baıqaýǵa 10 elden 19 arý qatysty. Olardyń ishinde Qazaqstannan - Roza Iarlabekova, Ásem Esengeldınova jáne Ksenıa Iakımchık, Armenıadan - Romella Tamarán, Ýkraınadan - Tatána Akýlenko, Lıka Shevchenko men Oksana Levchenko, Grýzıadan - Annamarıa Kacheıshvılı jáne Lıka Torıa, Tájikstannan - Malıkaboný Kaıýmova men Nazıra Mırzoeva, Belarýstan - Vıktorıa Lavrenko men Anna Panamareva, Reseıden - Arına Zınchenko, Vıktorıa Volgına jáne Janara Hasenova, Latvıadan - Larısa Agafonova, Qyrǵyzstannan - Sýsanna Egorán, sondaı-aq, Ózbekstannan - Dará Masalskaıa bar. Qatysýshylardyń jasy - 18-30 arasy. 

Reseıdiń atynan synǵa túsken Janara Hasenova - etnıkalyq qazaq. Janar ózge elde tursa da, óz elindegi joǵary oqý ornyna túskisi keledi.

«Men Chelábi oblysynyń Magnıtogorsk qalasynda dúnıege keldim. Ata-anam da sol jaqta týdy. Máskeýde ótken «Reseı arýy» baıqaýyna qatysyp, birinshi oryn alǵan bolatynmyn. Sodan osy baıqaýǵa joldama aldym. Jaqynda mektepti bitirdim. Qazir abıtýrıentpin. Astanadaǵy joǵary oqý oryndarynyń bireýine túsetin oıym bar», - dedi J.Hasenova QazAqparat tilshisine bergen suxbatynda. 

Búgingi baıqaýǵa atyshýly Sýsanna Egorán da qatysty. Byltyr ol «Qyrǵyzstan arýy» ataǵyn jeńip alǵannan keıin World Next Top Model 2017 Halyqaralyq baıqaýyna qatysqan bolatyn. Fınalda Sýsanna Armenıanyń jazýymen shyqty. Sol úshin qyrǵyzstandyqtar ony qatty synǵa aldy. Osy joly Sýsanna óz eliniń ataýy jazylǵan lentamen birge qyrǵyz xalqynyń ulttyq kıimin de kıip shyqty. 

Aıta ketken jón, «TMD Arýy» baıqaýy Qazaqstanda alǵash ret uıymdastyrylyp otyr. Ádil qazylardyń sheshimi boıynsha Vıktorıa Volgına (Reseı) úshinshi orynǵa ıe boldy. Ekinshi oryndy - Romella Tamarán (Armenıa) enshilese, birinshi orynda - Ásem Esengeldına (Qazaqstan). Al «TMD Arýy - 2018» Halyqaralyq baıqaýynyń altyn táji men Gran-prıin Tatána Akýlenko (Ýkraına) jeńip aldy. Budan bólek, arnaıy atalymdar da boldy. Baıqaýdyń syıaqy qory - 10 myń eýro.