Jańa televızıalyq maýsymnyń bastalýyna bar joǵy 3-aq kún qaldy. Qazirgi sátte bizde qyzý daıyndyq jumystary jalǵasýda. Stýdıalarda dekorasıalar boıynsha montajdaý jumystary júrgizilip, jaryq qondyrǵylary ornatylyp jatyr. Búgin sońǵy montajdyq jumystar aıaqtalǵan soń, senbi-jeksenbi kúnderi jańa stýdıalarda baǵdarlamalardyń alǵashqy túsirilimderin testileýden ótkizip, dúısenbi kúnnen bastap jańa maýsymǵa jol tartamyz. Bunyń bári óte kúrdeli jáne aýqymdy jumys boldy. Rebrendıngke baılanysty, aldynda da aıtyp óttim, kópshilik qaýym unatyp qoldaý kórsetti, sol úshin taǵy da alǵysymdy bildiremin. Aımaqtyq telearnalardy burynǵy tarıhı negizi bar ataýlarmen ataǵanymyz da ken qoldaý tapty. Jańa ataýlardyń tańbalanýyndaǵy keıbir suraqtarǵa baılanysty ýaıymdaýdyń esh qajeti joq, sebebi, latyn álipbıiniń bekitilgen nusqasy belgili bolǵan soń, bári de soǵan sáıkes aýystyrylatyn bolady. Bul testilik nusqa retinde sol ataýlardyń aǵylshyn tilinde qoldanylatyn úlgileri ǵana. Eń bastysy, jańa ataýlarǵa elimizdiń san ǵasyrlyq tarıhynan syr shertken ataýlardy engizgenimiz óte mańyzdy qadam boldy. Sondyqtan, aımaqtyq telearnalardyń jańa logotıpteri – Kókshe, Ertis, Aqjaıyq, Saryarqa sıaqty ataýlarmen ózgertiledi. Bastysy osy. Sondyktan, jyly nıet tanytyp jatqandaryńyz úshin taǵy da kóp rahmet! 
Biraq, bul maýsymnyń jańalyǵy efırdiń bezendirilýi, grafıkalyq jańarýy nemese rebrendıng ǵana emes, eń bastysy, ekranǵa shyǵatyn jańa baǵdarlamalar men jobalardyń mazmuny men sapasyna asa mán berilip otyrǵanyn atap ótkim keledi. Sol sebepti, negizgi jumys osy baǵytta júrgizilip jatyr. 
Korporasıa quramyna kiretin qurylymdardyń rebrendıngi birtindep júzege asatyn bolady. Ulttyq arnadaǵy jańa maýsym dúısenbi kúni, 28 tamyzda bastalsa, «Qazsport» arnasynyń efıri qyrkúıektiń 1-nen, al, balalarǵa arnalǵan tuńǵysh «Balapan» arnasy 4 qyrkúıekte jańarady. 14 aımaqta ornalasqan telearnalardaǵy jańa maýsym qyrkúıek aıynyń sońynda bir sátte kórermenge jol tartady. 
Jalpy aıtqanda, kórermenderimizdi qyzyqty da, tyń jobalarmen qýantatyn bolamyz. Ulttyq arnanyń jańa jobalary jaıynda tolyq aqparatty erteń habarlaımyn. 
Eń basty jańalyqtarymyz alda, sondyqtan, bizben birge bolyńyzdar!

Erlan Qarınniń feısbýk paraqshasynan