Áleýmettik jelilerde atyraýlyq júkti áıeldiń qaıtys bolǵany, onyń sáláfılik baǵytty ustanǵan dindar ekendigi jazylýda. Rasynda da, 12 qyrkúıek kúni Atyraý oblystyq perınataldyq ortalyqqa «Jedel járdem» kóligimen jetkizilgen 25 jastaǵy áıel qaıtys boldy.
Ortalyq dırektory Qýanysh Nysanbaevtyń jýrnalıserge bergen aqparaty boıynsha, Juldyz-1 yqshamaýdany, 4-kóshe, 5-shi úıdiń turǵyny Marta Baımuqanova júktiliktiń 38-shi aptasynda bolǵan. Tańerteńgi saǵat 8.55-te es-tússiz aýrýhanaǵa túsken ana men bala ómirin dárigerler saqtap qala almaǵan.
«Oǵan sebep – júkti áıeldiń dinı senimi boıynsha er dárigerge qaralýdan bas tartýy» dep jazady jelide. Bir derekte marqumnyń kúıeýi «Áıelimniń áýretti jerin er dáriger qaraýǵa bolmaıdy» dep, shaqyrtý boıynsha jetken «Jedel járdem» dárigerin úıine kirgizbeı qoıǵan kórinedi. Sonyń kesirinen komaǵa túsip ketken áıeldiń beti beri qaramaǵan.
Biraq Martanyń kúıeýi Bektas «Jas alash» tilshisine bergen jaýabynda «Jedel járdem» dárigeri áıel adam bolǵanyn, áıeliniń úıdegi balalarǵa alańdap, aýrýhanaǵa barǵysy kelmegenin, «barmaımyn» dep qolynan kolhat jazyp bergenin, eshkimge talap-tileginiń joqtyǵyn aıtady.
Alaıda «Jedel járdem» stansasynyń aqparaty boıynsha, atalmysh mekenjaıdan túngi saǵat 3 shamasynda alǵashqy shaqyrtý qońyraýy túsken. İle jetken «Jedel járdem» dárigeriniń er adam ekenin kórgen naýqastyń kúıeýi ony úıine kirgizbegeni shyndyq bolyp shyqty. Túngi saǵat 03-ten tańǵy 8.55-ke deıin júkti áıeldiń óziniń jáne sábıdiń ómirin qaýipke tigip úıinde otyrǵany anyqtalyp otyr.
Kúıeýi Bektas atyraýlyq jamaǵatqa áleýmettik jeli arqyly habarlandyrý bergen. Onda «Áıelim men balamnyn janazasy 14.09.2018 kúnı tan erten saǵat 10:00 de oqylady. Salafılerdin jolyn ýstangan jan edı. Eger karyzy bolsa magan habarlasynyzdar. Esımı Marta Baımýhanova Adres: Jýldyz 4 koshe Lıderge jetpeı onga býrylady Bektas» dep jazylǵan.
Búgin ana men balanyń denesi jer qoınyna tapsyryldy.
Belgili advokat Aıgúl Orynbek Facebook jelisinde «Artynda úsh balasy jetim qaldy. Osyndaı qarańǵylyqtyń arqasynda adam ólimi bolyp otyr. Anaý saqaldy zombıǵa zańdy túrde jazasyn berý kerek» dep ashyna ún qosqan.
Rasynda da, sońǵy jyldary ıslamdy burmalap, asyl dinimizdi durys túsinbeı, teris aǵymǵa ergen kóptegen ásiredinshil tarapynan keleńsiz ári qaıǵyly oqıǵalardyń oryn alyp jatqany jasyryn emes. Ómir esigin ashpaı jatyp shetinep ketken kúnásiz sábıdiń obaly kimge sonda? Bul óreskel qateliktiń oryn alýy sábıdiń týǵan ákesiniń tarapynan bolsa, tipti úlken kúná emes pe?!
Derekkóz: Durbi.kz
