Bul týraly búgin «NurOtanTalks» erkin oı alańynda aıtyldy. Tuńǵysh Prezıdent kúnine arnalǵan is-sharada qatysýshylar «Qazaqstandy ózgertken bastamalar» taqyrybynda áńgime órbitti.
Óz sózinde «Nur Otan» partıasy Tóraǵasynyń Birinshi orynbasary Elbasy sheshimderiniń el damýyndaǵy róli men mańyzyna toqtaldy. Sondaı-aq ol Elbasymen birge jumys isteýdi ózine berilgen úlken múmkindik dep esepteıtinin aıtyp, Memleket basshysynyń kópke úlgi bolarlyq basty úsh qasıetine toqtalyp ótti.
– Birinshiden, Elbasynyń únemi ózin ózi jetildirip, izdenip, jańa, tyń bastamalardy meńgerýdegi tabandylyǵyn aıryqsha aıtqym keledi. Bul – naǵyz kóshbasshyǵa tán qasıet. Bárimiz, ásirese jastar dál osy qasıetti boıymyzǵa sińirip, ózimizge úlgi etýimiz kerek. Ekinshi erekshe qasıet retinde Elbasynyń aıryqsha jaýapkershiligi men ózine ózi joǵary talap qoıatynyn atap óter edim. Memleket basshysy kez kelgen kezdesý men is-sharaǵa óte tyńǵylyqty ári jan-jaqty daıyndalady. Ózime erekshe áser etken Elbasynyń kelesi qasıeti uqyptylyǵy men muqıattylyǵy. Qandaı tyǵyz jaǵdaı bolsa da Memleket basshysy belgilengen is-sharalardy ýaqytynda bastaıdy. Bul – búginde bılik tutqasyn ustaǵan barsha azamattarǵa úlgi bolatyn qasıet. Prezıdentimizdiń osyndaı qasıetterinen ózim de kóp nárse úırenip, mol tájirıbe jınadym, – dedi Máýlen Áshimbaev.
Sonymen qatar «Nur Otan» partıasy Tóraǵasynyń Birinshi orynbasary elimizdiń damýyna erekshe yqpal etken Elbasynyń asa mańyzdy úsh strategıalyq bastamasyn atap ótti. Onyń aıtýynsha, «Bolashaq» baǵdarlamasy, elordamyzdyń Almatydan Astanaǵa aýystyrylýy jáne «Rýhanı jańǵyrý» baǵdarlamasy Qazaqstandy damýdyń jańa deńgeıine bastaǵan bastamalar.
İs-sharaǵa «Mıloserdıe» qaıyrymdylyq qorynyń negizin qalaýshy, qoǵam belsendisi Arýjan Saın, Halyqaralyq Túrki akademıasynyń prezıdenti Darhan Qydyráli jáne «Ulttyq kardıohırýrgıalyq ǵylymı ortalyǵy» AQ-nyń basqarma tóraǵasy Iýrıı Pá qatysyp, Elbasymen kezdesýlerden alǵan áserlerimen jáne taqyrypqa qatysty oılarymen bólisti.
