Respýblıkalyq baıqaý Astana ákimdigi men «Atameken» UKP qoldaýymen ótti. Bıznes-hanymdar  óziniń jobasy týraly beınevızıtka, erýdısıa jáne shyǵarmashylyq nomer sıaqty úsh kezeńde baq talastyrdy. Bul jaıynda Qamshy.kz aqparat agenttigi elorda ákimdiginiń resmı saıtynyń málimetine súıene otyryp málimdeıdi.

«Baıqaýǵa qatysqandardyń barlyǵy da erekshe ári sulý. Qyzdardyń barlyǵy teń dárejede. Olar – aımaqtarynda ótken kezeńniń jeńimpazdary. Munda kileń myqtylar jınaldy»,  - dedi ádilqazylar múshesi, Sınergıa ýnıversıtetiniń prezıdenti Baýyrjan Qasymbirgebaev.

Baıqaýda aqtóbelik «Mediapro» balalar prodúser ortalyǵynyń basshysy Janargúl Dosova jeńis tuǵyrynan kórindi.  

«Bizde shyǵarmashylyq akademıa bar. Onda biz balalarǵa vokal, akterlik sheberlik, horeografıa syndy baǵyttarda bilimi men qabiletin ushtaımyz. Bizde kóptegen kınojobalar, kınofestıvalder bar. Sondaı-aq, balalar telejobalarǵa da qatysady. Al men sahnaǵa shyqsam dep armandaıtynmyn. Sol armandarymnyń barlyǵy oryndalýda. Bul – sózben jetkizilmeıtin ǵajap sezim», - dep bólisti áserimen jarystyń jeńimpazy Janargúl Dosova. 

Baıqaýdyń negizgi maqsaty – jas áıelder arasynda belsendi ómirlik pozısıasyn qalyptastyrý, Qazaqstan isker áıelderiniń ımıjin kóterý, kásipkerlikte, mamandyǵynda, qoǵamdyq ómirde, saıasatta jáne shyǵarmashylyqta tabysty áıeldiń obrazyn qalyptastyrý.