«Nur Otan» turǵyn úı komýnaldyq salasy men tabıǵı monopolıserdiń jumysyna monıtorıń júrgizýdi bastady
«Nur Otan» partıasy Qazaqstan Parlamenti Májilisiniń kezekti fraksıasy barysynda Memleket basshysy Nursultan Nazarbaevtyń tapsyrmalaryn tıimdi oryndaýǵa yqpal etetin normatıvtik-quqyqtyq aktilerge qajetti ózgerister men tolyqtyrýlar engizýdi josparlap otyr.
«Nur Otan» partıasy qazirgi ýaqytta Prezıdent Joldaýyndaǵy tapsyrmalardy júzege asyrýǵa belsene kiristi. Keńeıtilgen otyrys partıanyń ortalyq apparatynda ótti. Onda búgingi kúnniń ózekti máseleleriniń biri – turǵyn úı-kommýnaldyq sharýashylyqty reformalaý talqylandy.
Eske salyp óteıik, Memleket basshysy óz Joldaýynda ekonomıkadaǵy básekelestikti damytý jáne turǵyn úı-kommýnaldyq sharýashylyq pen tabıǵı monopolıalardyń sýbektilerin retteý, tarıfterdi ornatý monopolıserdiń ınvestısıalyq mindettemelerin tıimdi baqylaý máselelerin kótergen. Búginde tutynýshylardan jınalǵan qarajatty ıgerý durys júrgizilip jatqan joq. Óz kezeginde Prezıdent bul máseleni qaıta qarap sheshýge, monopolıaǵa qarsy vedomstvonyń jumysyn reformalaýǵa úsh aı berdi.
Joldaýda aıtylǵan barlyq sharany júzege asyrýda zańnamalyq qoldaý kórsetý maqsatynda partıa músheleri «Turǵyn úı komýnaldyq sharýashylyqqa baılanysty Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyn talqylady. Qazaqstandyqtar úshin bul másele birneshe jyldan beri ózektiligin joımaı tur.
«Nur Otan» partıasyna qarasty Strategıalyq zertteýler ınstıtýtynyń málimetine súıensek, azamattardyń 36 paıyzy servıstik kompanıalardyń qyzmetinde ashyqtyq bolmaýy men kiris shyǵyndaryndaǵy baqylaýdyń joqtyǵyn aıtyp, narazylyqtaryn bildirgen.
«Nur Otan» partıasy Tóraǵasynyń birinshi orynbasary Máýlen Áshimbaev otyrysty asha otyryp turǵyn úı sektoryndaǵy turǵyn úı qurylysy aıasyndaǵy birqatar sheshilmegen máseleni, sonyń ishinde komýnaldyq qyzmetteriniń negizi máselelerin kóterdi.
«Nur Otan» partıasy Elbasy Joldaýyndaǵy tapsyrmalar men mindetterdi tıimdi oryndaı otyryp, turǵyn úı-kommýnaldyq sharýashylyq salasyndaǵy tártipti retke keltirýge, sonymen qatar tabıǵı monopolıserdiń tarıfterin retteýge kúsh salamyz, ári bul bizdiń búgingi tańdaǵy mindetimiz bolyp sanalmaq. Bul partıamyzdyń aldynda turǵan úlken jumysqa serpin beredi», - dedi Máýlen Áshimbaev.
«Nur Otan» partıasy Tóraǵasynyń birinshi orynbasary turǵyn úı-kommýnaldyq sharýashylyq týraly qoldanystaǵy zańnamaǵa ózgerister men tolyqtyrýlar engizý týraly zań jobasy Parlamenttiń qaraýynda ekenin de eskertti. Partıa men múddeli taraptardyń maqsaty – taldaý, aıaqtaý jáne halyqtyń kútýine saı keletini-kelmeıtinin túsiný.
«Biz osy salada tıimdi monıtorıń uıymdastyramyz. Monopolıser qalaı jumys isteıdi, komýnaldyq kompanıa qyzmetkerleri qalaı jumys isteıdi. Biz bul qyzmette tıimdi monıtorıń júıesin qurý úshin qoǵamdyq uıymdarmen, úkimettik emes uıymdarmen, múddeli adamdarmen yntymaqtasýǵa daıynbyz», - dedi Máýlen Áshimbaev.
Usynylǵan túzetýler kondomınıým nysandaryn basqarý men júrgizý jáne olardy oryndaý tártibin retteýge baǵyttalǵan. Jańartylǵan zań jobasy turǵyn úı komýnaldyq sharýashylyqtyń biryńǵaı memlekettik aqparattyq júıesin qurý múmkindigin de qarastyrady. Ázirlengen quqyqtyq normalyq akt azamattardyń Turǵyn úı-qurylys kooperatıvine kirýi arqyly turǵyn úıdi satyp alý múmkindigin arttyrý men qoldanystaǵy zańnamalyq kemshilikter men qaqtyǵystardy joıýǵa baǵyttalǵan.
Jalpy alǵanda túzetýler turǵyn úı-kommýnaldyq sharýashylyq qyzmetin reformalaýdaǵy birneshe mindetti birden sheshýge arnalǵan, onyń ishinde: basqarma kompanıalarynyń qyzmet sapasyn qamtamasyz etý; komýnaldyq qyzmet pen tólemderdi esepke alýdy jetildirý, onyń ishinde basqarýshy kompanıalardyń qyzmetterine aqy tóleý, tarıfterdiń ashyqtyǵy men baqylaýdy qamtamasyz etý; turǵyn úı-kommýnaldyq sharýashylyq salasyna joǵary tehnologıalardy engizý, máselen, basqarýdy avtomattandyrý jáne sıfrlandyrý; jalpy múlikti esepke alý rásimderin jetildirý; jalpy múlikti jóndeýdi turaqty negizde qamtamasyz etý.
Kezdesýge Qazaqstan Respýblıkasy Parlamentiniń depýtattary, «Nur Otan» Halyqtyq-demokratıalyq partıasynyń zań keńesi músheleri, memlekettik organdar men úkimettik emes uıymdardyń ókilderi, sonymen ár túrli óńirden ókilder qatysty.
