Ilon Masktyń «SpaceX» kompanıasy ál-Farabı atyndaǵy QazUÝ-da jasalǵan qazaqstandyq «Al-Farabi-2» nanospýtnıgin iske qosty.
Ushyrý 4 jeltoqsanda Astana ýaqyty boıynsha 00-den 32 mınýt ketkende Kalıfornıa (AQSH) shtaty ǵarysh alańyndaǵy Vandenberg áskerı-áýe bazasynda «Falcon 9» zymyran tasymaldaýshysynda júzege asty. Nanospýtnık shtattyq kestede jumys isteıdi.
«Al-Farabi-2» nanospýtnıgi úzdik ınovasıalyq tehnologıalardy, qazaqstandyq patentpen qorǵalǵan apparattyń negizgi komponentterin jáne torabtaryn ózine biriktiredi. Ol ǵylymı túpnusqalardy, tehnologıalyq jáne bilim berý tapsyrmalaryn sheshýge arnalǵan, sonymen birge QazUÝ ǵalymdary jasaǵan shaǵyn ǵaryshtyq apparatqa arnalǵan bortty kompúterdiń elektrondy komponentterin tájirıbeden ótkizýge múmkindik beredi. Ǵylymı-zertteý jumystardyń jáne eksperımentterdiń nátıjeleri Qazaqstan áýe-ǵarysh salasyna jáne ýnıversıtettiń sheteldik seriktesterine qundy jáne ózekti bolmaq.
«Qazaqstan Respýblıkasynyń Táýelsizdik kúni qarsańynda qazaqstandyq nanospýtnıktiń ashyq ǵaryshta iske qosylýy – qazaqstandyq ǵylym men spýtnık qurastyrý tarıhynda taǵy bir mańyzdy kezendi aıǵaqtaıdy. QazUÝ nanospýtnıgi osymen ekinshi ret ǵaryshqa engizildi. Birinshi «Al-Farabi-1» ǵaryshqa 2017 jyldyń 15 aqpanynda Úndistandaǵy Satısh Dhavan atyndaǵy ǵarysh alańynan jiberilgen bolatyn. Ol túrik áleminiń kórnekti oqymystysy, bizdiń ýnıversıtetke esimi berilgen ál-Farabıdiń qurmetine atalǵan bolatyn», - dep atady joba jetekshisi akademık Ǵalym Mutanov.
Ǵaryshtyq tehnologıalar salasynda ulttyq ǵylymı mektep qurý, jobalaý, qurastyrý jáne nanospýtnıkterdi ushyrý boıynsha keń kólemdi joba, osy salada joǵary bilikti mamandardy daıarlaý QazUÝ-da halyqaralyq «UNIFORM» konsorsıýmy aıasynda 2013 jyldan beri júzege asyrylyp keledi.
Ál-Farabı atyndaǵy QazUÝ Qazaqstandy «sıfrly dáýirge» engizý boıynsha «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Qazaqstan halqyna arnalǵan Joldaýda aıtylǵan Elbasy tapsyrmalaryn oryndaýda maqsatty túrde jumystar júrgizýde. Ǵylymdy qajet etetin jańa tehnologıalardy jáne tehnıkalyq, sonyń ishinde ǵaryshtyq salada quraldardy qurý ýnıversıtet qyzmetindegi basym baǵyttar bolyp tabylady.
