Almatyda úsh birdeı adamnyń ómirin jalmaǵan jol apatyna qatysty tergeýdi QR İshki ister mınıstrligi óz baqylaýyna aldy dep habarlady mınıstrliktiń resmı ókili Almas Sádýbaev.
Eske salaıyq, 29 jeltoqsan kúni tańerteń Mercedes-Benz Gelandewagen jol talǵamaıtyn avtokóligi baǵdarshamnyń qyzyl túsi janyp turǵanyna qaramastan asa joǵary jyldamdyqpen qıylystan júıitkip ótpek bolyp, Mitsubishi avtokóligin soqqan bolatyn. Soqqynyń qatty bolǵanynan zardap shekken kólikte otyrǵan tórt adamnyń úsheýi qaıtys boldy. Olardyń biri kólik júrgizýshisi bolsa, ekeýi jolaýshy.
Mercedes-Benz avtokóliginiń júrgizýshisi men jolaýshylary oqıǵa ornynan qashyp ketken. Kúni keshe Almaty qalalyq polısıa basqarmasy qashqan júrgizýshiniń ustalǵanyn aıtty. Alaıda, kúdiktiniń kim ekenin jarıalaǵan joq. Bul óz kezeginde qoǵam belsendileriniń narazylyǵyn týdyrýda. Eks-depýtat jáne QR BǴM burynǵy vıse-mınıstri Murat Ábenov, jýrnalıs Gúljan Erǵalıeva syndy azamattar jol apatyn jasaǵan júrgizýshiniń yqpaldy adam bolýy jáne jazadan sytylyp ketýi múmkin ekenin jazýda.
Alaıda, QR İİM resmı ókili Almas Sádýbaev mınıstrlik atalǵan isti óz baqylaýyna alǵanyn málimdedi.
"Marqumdardyń otbasyna qaıǵyra kóńil aıtamyn. Al, jaraqat alǵan naýqastyń tezirek jazylyp ketýin tileımin. Tergeý bólimi jol apatyn jan-jaqty tekserý ústinde jáne oǵan kúmán keltiretin eshqandaı sebep joq, is baqylaýda", - dedi Sádýbaev.
Pikir qaldyrý