Qazaqstandyq áıelderdiń zeınet jasy taǵy da ulǵaıtyldy. Ol 2019 jyldyń 1 qańtarynan bastap 59 jas boldy.

Qazirgi tańda er adamdar 63 jasta zeınetke shyǵatyn bolsa, áıel adamdardyń zeınet jasy, zeınetaqymen qamtamasyz etý zańyna sáıkes, alty aıǵa ulǵaıtylyp keledi.

Osydan bir jyl buryn, ıaǵnı 2018 jyldyń 1 qańtarynda áıel adamdardyń zeınet jasy 58,5-ti quraǵan bolatyn. Al 2019 jyldyń 1 qańtarynan bastap ol 59 jas boldy. 2020 jyly 59,5-ke ulǵaıatyn bolsa, 2021 jyldyń 1 qańtarynan bastap áıelder zeınetke 60 jasynda shyǵatyn bolady. Osy úrdispen, áıel adamdardyń zeınet jasyn 2027 jylǵa deıin 63 jasqa ulǵaıtý kózdelgen.

Sonymen qatar, qazaqstandyqtar jetkilikti somany jınaǵan jaǵdaıda 50 jasynda zeınetke shyǵýǵa quqyly. 2018 jyly bul somanyń kólemi 13,5 mıllıondy qurady.