Dımash Qudaıbergen "Olımpııskıı" kesheniniń sahnasynda turyp Igor Krýtoıdyń súıemeldeýimen "Sharshaǵan aqqýlardyń mahabbaty" atty ándi oryndady. Talantty qazaqstandyqtyń tyńdarmandary ony taǵy da gúldiń astynda qaldyrdy. Bul týraly Sputnik Qazaqstan agenttigi jazdy. 

Konsert jeltoqsan aıynyń basynda túsirilgen bolatyn. Al telearnadan 1 qańtarda kórsetildi.

"Sharshaǵan aqqýlardyń mahabbaty" atty týyndynyń sózin Mıhaıl Gýserıev, al ánin Igor Krýtoı jazǵan. Alǵash ret Dımash bul ándi 10 qarasha kúni Reseıdiń quqyq qorǵaý organdary qyzmetkerleri kúnine oraı Kreml saraıynda ótken konsertte shyrqady.

Ánshiniń álemniń túkpir-túkpirindegi tyńdarmandary vıdeonyń astyna qazaq ánshisiniń talantyna qaıran qalǵandaryn jarysa jazyp jatyr. Sondaı-aq, olar qazaqstandyqtardy Dımashtaı talantty baǵalaýǵa shaqyrdy. 

"Dımash, siz genısiz! Sizdiń oryndaýyńyzdaǵy taǵy bir shedevr. Mereke kúnderi keremet kóńil-kúı syılaǵanyńyz úshin rahmet", "Bravo! Tańǵajaıyp Dımash! Otbasymyzben jıylyp kúttik. Daýysyńyz júregimizdi tebirentti", "Aıtarǵa sózim joq! Tek únsiz tyńdaý kerek", "Qazaq ándi jaqsy aıtatyn halyq. Sol sebepti ol jerde mundaı talanttardyń dúnıege kelýi oryndy. Qudaı sekildi", "Qazaqstandyqtar, uldaryńyzdy baǵalańyzdar! Alla jamandyqtan saqtasyn", "Dımash tek Qazaqstannyń maqtanyshy emes. Belarýs eli de onymen maqtanady" dep jazdy jeli qoldanýshylary.