Qazaqstandyq fıgýrıstiń anasy Oksana Ten marqum Denıs Tenniń ólimine baılanysty sot zalynda túsinikteme berdi. Oksana Ten ulynyń tapsyryspen óltirilgenine senimdi.
«Alǵashqy sekýndtan bastap-aq munyń jaı ǵana avtourlyq ekenine senbedim. Bul meniń analyq sezimim ǵana emes, ıntýısıam. Bolǵan jaıtpen nege kelise almaı turǵanym sizderdi qyzyqtyrǵan bolar. Denısti ońaılyqpen ashýlandyra almaısyń. Ol úshin ony arandatý kerek. Kúdiktiler de dál solaı istedi», - dedi Oksana Ten.
Anasynyń aıtýynsha, tergeý prosesi jaqsy ótti, alaıda ólimniń aıaqasty bolǵanyna ol senbeıdi.
Sot Almaty qalasynda osymen ekinshi kúni ótip jatyr. Sot prosesi qazaq tilinde júrýde. Tóraǵalyq etýshi sýdıa – Keńshilik Ábdildınov.
Denıs Tenniń ólimi
Eldiń maqtanyshy, qazaqstandyq fıgýrıst Denıs Ten 2018 jyldyń 19 shildesinde qaıtys boldy. Denıs óziniń kóligindegi aınany urlamaq bolǵan eki uryny baıqap qalady. Ustamaq bolǵanda, olardyń biri sanyna pyshaq tyǵyp jiberedi. Kóp qan joǵaltqan Denıs Ten aýrýhanada qaıtys bolady. Denıstiń jasy nebári 25-te edi.
Fıgýrıstiń isi boıynsha búginde úsh kúdikti anyqtalyp otyr: Olar - Arman Qudaıbergen, Nuraly Qıasov jáne Janar Tolybaeva.
