Almaty qalasynda Almaly aýdandyq sotynda 2018 jyldyń 29 jeltoqsanynda bolǵan jol apatyna kináli ulty dúngen Kar Ilástyń soty júrýde, - dep jazady Qamshy.kz aqparat agenttigi.

Úsh adamnyń ómirin qıǵan jantúrshigerlik jol apatyna kináli Kar Ilás búgingi sot otyrysynda oqıǵanyń qalaı bolǵanyn búge-shúgesine deıin aıtyp berdi.

♦Atyshýly Ilás Kar oqıǵa ornynan ne sebepti qashyp ketkenin túsindirdi

Sot otyrysynda marqum Sholpan Elgezekovanyń aǵasy kináli taraptyń 4 mıllıon teńge kóleminde moraldyq ótemaqy tólegenin aıtty. Al jol apatynda aman qalǵan aktrısa Aızada Satybaldıevanyń kúıeýi Baqyt Bedelhan óziniń tarapynan kináliniń ústinen sotqa aryz jazbaǵanyn aıtty.

«Men úshin eń bastysy – Aızadanyń amandyǵy. Allaǵa shúkir, Aızada aman qaldy, búginde beti beri qarap keledi. Biraq bolǵan oqıǵa múldem esinde joq. Kináli azamatqa keshirim berý kerektigin ózi aıtyp otyr. «Olarǵa keshirim beretin bolsaq, men erterek saýyǵamyn, olar maǵan jaqsy tilekter aıtatyn bolady...» deıdi. Biraq, ol óziniń eki qurbysy men taksı júrgizýshisiniń sol túnde qaza tapqanyn bilmeıdi. Bul oqıǵa onyń esinde joq. «Ne sebepti men sol túni Abaı - Seıfýllın kósheleriniń qıylysynda júrdim? Qaıda bara jattym? Meniń qasymda taǵy kimder boldy?».-dep suraıdy. Basynan qatty soqqy alǵandyqtan qazir oǵan ýaıymdaýǵa, jaman nárselerdi oılaýǵa bolmaıdy. Sondyqtan, «taksıde tek sen ǵana boldyń, taksı júrgizýshisi de aman» dep aıtýǵa týra keldi», - deıdi Baqyt Bedelhan.

Onyń aıtýynsha, Aızada Satybaldıevany aýrýhanadan shyǵarǵannan keıin úsh kúnnen soń qaıtadan aýrýhanaǵa jatqyzypty. "Úıde durys kútine almaǵandyqtan tolyqtaı saýyǵyp ketýi úshin osy durys sheshim" dep qabyldaǵan eken. Baqyt Bedelhan óz sózinde búginde aktrısanyń jaǵdaıy jaqsaryp kele jatqanyn aıtty. Sondaı-aq marqum qurbysy Sholpan Elgezekova jaıynda suraıdy eken.

«Shopık nege habarlaspaıdy? Ol únemi habarlasatyn edi ǵoı, odan nege esh habar joq?» dep suraıdy. Keıin «Sholpandy Túrkıaǵa issaparmen ketipti, seniń jaǵdaıyńdy estimegen bolar» dep aldaýsyrattyq», - deıdi aktrısanyń jary.

Belgili bolǵanyndaı, apat bolǵan kúni Sholpan Elgezekova Astanadan kelip qurbylarymen bas qosyp otyrypty. Keıin olar Sholpannyń úıine qaraı bet alǵan bolatyn, jol apaty sol kezde oryn aldy.

«29-y keshkisin Aızada Shymkenttegi kári anasyna baryp, Jańa jylda sol kisiniń qasynda bolýdy josparlaǵan edi. Al Sholpan sol kúni Astanaǵa ushyp ketý kerek bolatyn. Biraq,  osylaı boldy, jazataıym jaǵdaı ǵoı», - deıdi Baqyt Bedelhan.

Joǵaryda atap ótkenimizdeı aktrısa men onyń jary Baqyt Bedelhan kináli azamattyń ústinen aryz jazbaǵan.

«Ol óziniń qylmysyn moıyndady, kólikti soqqanyn, sonyń saldarynan úsh adamnyń qaza tapqanyn moıyndap otyr. Men basynda-aq sóz alǵanda eshnárse de suramaıtynymdy aıtqanmyn, barlyǵyn da ózderiniń uıatyna qaldyrdym. Kináli azamattyń týystary Aızadaǵa baryp, ony kórdi, keshirim surap, moraldyq ótemaqy tóleıtinderin aıtty. Aızadanyń ózi de oǵan keshirim bereıik dep otyr. Men úshin, eń bastysy, Aızada saýyǵyp ketse boldy.

Al sol jol apatynda qaza tapqan marqumdardyń týystaryn da túsinemin, olar adam joǵaltyp otyr, óte qıyn jaǵdaı», - dep aıtty Baqyt Bedelhan.

Esterińizge sala keteıik, ótken jyldyń 29 jeltoqsanynda Almaty qalasyndaǵy Abaı Seıfýllın kósheleriniń qıylysynda Gelendwagen jáne Mitsubishi kólikteri soǵysyp, úsh adam – Sholpan Elgezekova, Dınara Hamıtova jáne Baqytnur Qunapıauly – qaza tapqan bolatyn. Alǵashqyda Gelendwagen júrgizýshisi Ilás Kar mas kúıinde rúlge otyryp saǵatyna 120 km jyldamdyqpen kelip jeńil avtokólikti soǵyp ótti degen aqparat taraǵan bolatyn. Tergeý jumysy barysynda kináli azamat Ilás Kardyń mas bolmaǵanyn kórsetti, sondaı-aq kináli azamat sotta ózine taǵylǵan «mas boldy» degen aıyppen kelispeıtindigin aıtty.