Qazaqstanda múgedek balalardyń kútimine beriletin járdemaqy ósedi. Bul týraly Eńbek jáne halyqty áleýmettik qorǵaý mınıstri Berdibek Saparbaev aıtty, - dep habarlaıdy Qamshy.kz aqparat agenttigi Tengrinews.kz saıtyna silteme jasap.

"Múgedek balalarǵa beriletin járdemaqy jaıly aıtatyn bolsaq, 18 jastan asqan múgedek balalarǵa osyǵan deıin 31 183 teńge berilse, endi ol járdemaqy 10 myń teńgege ósip, 41 578 teńgege jetti", - dedi Saparbaev úkimette ótken baspasóz máslıhaty barysynda.

Vedomstvo basshysy mınıstrliktiń jergilikti atqarýshy organ ókilderimen birige otyryp, árbir otbasyǵa arnalǵan biryńǵaı áleýmettik karta daıyndap jatqanyn aıtty. "Osy kartanyń negizinde elimizdegi muqtaj adamdardy anyqtap, olarǵa kómek pen qoldaý kórsetemiz. Basty maqsatymyz - densaýlyǵynyń bolmaýyna baılanysty jumys isteı almaǵan adamdardyń jumysqa ornalasýy. Olarǵa jumys oryndaryn usynamyz, ornalastyramyz", - dedi Eńbek jáne halyqty áleýmettik qorǵaý mınıstri.

Sondaı-aq, ol múmkindigi shekteýli jandar men aýylda turatyndarǵa mıkronesıe berý múmkindigi qarastyrylyp jatqanyn aıtty. Saparbaev áleýmettik kómek berýdiń qalaı jeńildeıtinin aıtty.

Usynǵan: Maqpal Sembaı