Áleýmettik jelilerde UQKD arnaıy jasaǵy qyzmetkerleriniń Avangardtaǵy bes qabatty úıdiń aýlasynda úsh er adamdy shalshyqqa etpetinen jatqyzyp, kúshtep ustaǵany túsirilgen beınejazba tarap ketken. «AJ»-ǵa belgili bolǵandaı, bular esh shimirikpesten adam urlap, qun talap etip júrgen «salafızm» dinı aǵymyn ustanýshylar dep jazady Qamshy.kz aqparat agenttigi jergilikti BAQ-tyń deregin negizge alyp.
Atyraý oblystyq Polısıa departamentiniń Ekstremızmge qarsy is-qımyl basqarmasynda oqıǵaǵa qatysty bylaı dep habarlady: «1990 jáne 1991 jylǵy úsh azamat 16 sáýirde Ózbekstan azamaty S.Ia.-ny kúsh qoldanyp, páterinen alyp ketken. Sodan keıin urlanǵan adamnyń dosy, Ózbekstan azamaty M.S.-dan 300 myń teńge bopsalaı bastaǵan. Budan buryn qaskóılerdiń M.S.-dan 100 myń teńge kóleminde aqsha alǵany anyqtaldy».
Ustalýshylardan jábirlenýshilerdiń aqshalary men zattary jáne urlanǵan jigitti uryp-soqqan nýnchakı men jábirlenýshiniń birine tıesili «Lada Largýs» kóliginiń kilti tárkilendi. Úsheýine qatysty adam urlaý jáne bopsalaý faktisi boıynsha qylmystyq ister qozǵaldy. Materıaldar ári qaraı tergeý úshin Polısıa departamentine joldandy.
19 sáýirde Atyraý mamandandyrylǵan tergeý soty kúdiktilerdi 2 aı merzimge tergeý abaqtysyna qamaýǵa sanksıa berdi. Olar qylmystaryn moıyndap otyr.
Usynǵan: Ásel Bolatqyzy
