Aldyn ala nátıjeler boıynsha Germanıanyń solshyl sosıal-demokrattary eldegi federaldy saılaýda kansler Angela Merkeldiń partıasynan basym túsip, jeńip kele jatyr.

Sosıal-demokrattar 25,7% daýys jınady, al Merkeldiń konservatıvti partıa blogy (Hrıstıan-demokratıalyq odaǵy jáne hrıstıan-áleýmettik odaǵy) 24,1% daýysqa ıe boldy.

Al, "Jasyldar" partıasy óz tarıhyndaǵy eń jaqsy nátıjege qol jetkizip, 14,8% daýyspen úshinshi orynǵa shyqty.

Endi úkimet jasaqtaý úshin koalısıa qurý kerek.

Sosıal-demokrattar kóshbasshysy Olaf Shols buǵan deıin óz partıasynyń eldi basqarýǵa aıqyn mandaty bar ekenin aıtqan.  

Qazirgi kansler koalısıa qurylmaıynsha eshqaıda ketpeıdi. Al, koalısıa Rojdestvoǵa týra kelýi múmkin.