Almatynyń 2040 jylǵa deıingi Bas josparyn túzetý boıynsha qoǵamdyq talqylaýlar aıasynda mundaı is-sharalardy ótkizbesten buryn zańmen belgilengen rásimderdiń saqtalýy týraly másele kóterildi. 

Almaty qalasy Sáýlet, qala qurylysy basqarmasynyń basshysy Almas Jańbyrshynyń aıtýynsha, qoǵamdyq talqylaýlar Qazaqstan Respýblıkasy Indýstrıa jáne ınfraqurylymdyq damý mınıstriniń 2020 jyly 30 qyrkúıektegi №505 buıryǵymen bekitilgen «Qala qurylysy jobalaryn (eldi mekenderdiń bas josparlary, egjeı-tegjeıli josparlaý jobalary jáne qurylys jobalary) ázirleý, kelisý jáne bekitý qaǵıdalaryna» (budan ári – Qaǵıdalar) sáıkes ótkiziledi.

«Qaǵıdalarǵa sáıkes, qoǵamdyq talqylaýlar ótkizý kúni ashyq jınalys túrinde buqaralyq aqparat quraldarynda habarlandyrý jarıalanǵan kúnnen bastap keminde jıyrma kúntizbelik kúnnen keıin belgilenýge tıis. Biz 25 qarashada Almaty qalasynyń Bas josparyn túzetý jobasy boıynsha qoǵamdyq talqylaýlardyń 24-26 jeltoqsan aralyǵynda ótetini týraly resmı túrde jarıaladyq. Sonymen qatar, basqarmanyń saıtynda túzetý jobasy jarıalandy, onymen kez kelgen adam tanysa aldy. Aıta ketý kerek, jobanyń ózi qansha ýaqytqa jarıalanýǵa tıis ekeni Qaǵıdalarmen naqty rettelmegen», – dedi ol.

Bas sáýletshi qoǵamdyq talqylaýlar týraly habarlandyrýda barlyq qajetti aqparat kórsetilgenin aıtty. Atap aıtqanda, qosymsha málimet alýǵa, josparlanǵan talqylaýǵa qatysty qujattardyń kóshirmesin suratýǵa bolatyn elektrondy poshta men telefon nómiri bar.

«Rásimderdiń saqtalýyna qatysty eskertýlerden keıin barlyq qaǵıdany qaıta qarap, zań talaptarynyń tolyq saqtalǵanyna kóz jetkizdik. Sol sebepti, qazirgi tańda qoǵamdyq talqylaýlardy buryn belgilengen merzimde ótkizip jatyrmyz», – dedi Almas Jańbyrshy.