13 Сәуір, 2022 Саясат Өзгерту

Мәсімовты босату бойынша пиар-компания басталып кетті ме?

Фото: Ашық дереккөз

Кеше Karimmassimov.com сайтында қаңтар оқиғасынан кейін қамалып, бүгінде қылмыстық кодекстің 5-бабы бойынша тергеліп жатқан ҰҚК-нің экс-төрағасы Кәрім Мәсімовтің денсаулығы нашарлағаны туралы ақпарат шықты. Ол жерде "Мәсімов көптеген созылмалы сырқаттармен ауырады, соның ішінде жүрегі нашар, дәрігерлер оны дереу қамаудан босату керектігін айтып отыр" делінген. Ақпарат ресми болмаса да біраз адам оған реакция танытып, Мәсімовтің босатылуына қарсылық білдіріп үлгерді.

Журналист Серікжан Мәуленбай жүргізетін, ресми түрде БАҚ деп тіркелген "БЕСсимптомно" Telegram-каналы қазақстандық және ресейлік кей ақпарат құралдары мен Telegram-каналдар Кәрім Мәсімовті қолдау бойынша белсенді пиар-компанияны бастағанын жазады. Желілік басылымның мәліметінше, Мәсімовті ақтап жазу үшін блогерлерге 200 еуро (шамамен 97 мың теңге) ұсынғаны туралы да ақпарат бар. Telegram-канал Жаңа Қазақстанда бәрі заң алдында тең, Мәсімов айыпталып отырған мемлекеттік төңкеріс жасау әрекеті туралы іс барынша ашық болатынына, сот әділ шешім шығаратынына сенім білдіреді.

Ал қоғам белсендісі Мұхтар Тайжан қамауда отырғандардың ішінде ауырып, хәл үстінде жатқан күдіктілер мен сотталушылар көп екенін тілге тиек етіп, Мәсімовті босату туралы сөз қозғаудың өзі артық деп санайды.

"Ол кәнігі спортшы сияқты еді ғой. Желіде түрлі марафондарға қатысқанынан көптеген сурет бар. Марафоншының жүрегі ауырады дегенмен келісу қиын. Екіншіден, барлық азаматқа, оның ішінде сотталушыларға бірдей көзқарас болуы керек. Егер Мәсімовті осындай диагнозбен босататын болса, мұндай диагноз қойылған барлық сотталушыны босатсын. Мәселен, қазір қаңтар оқиғасы бойынша сотталып жатқандар көп. Солардан жүректің ишемиялық ауруына анализ алып көрейік, диагноз расталса, босатайық. Бірақ олай болмайды ғой. Аронды қандай жағдайда босатқанын бәріміз білеміз. Сондықтан Кәрім Мәсімовты босату туралы сөз қозғаудың өзі артық. Оның үстіне ол отанға опасыздық жасады деп айыпталып отыр" дейді қоғам белсендісі.

Журналист Салтанат Әшірбай "30 жыл бойы Қазақстанның байлығын жеп, асып-тасыған ұрыларға аяушылық болмауы керек" деген пікірде.

"Кеше Мәсімовтің жүрегі ауырыпты тағысын тағы деген ақпар тарапты. Ұрылар халық қазынасын жегенде беттері бүлк етпей, тамыры жыбырламады ма? Қазақты аяған ұры бар ма? Аяғына қызыл-жасыл шұлық киіп марафон жүгірген Мәсімовтің ауырмаған жүрегі енді түрмеде инфаркт ұстап қалыпты. Бұл жүйе Жәкішев пен Аронды аяған жоқ. Жас өмірін түрменің теміріне телміртіп өткізді. Түрмеде алған дертінен айықпай Арон ағамыз бақилық болып кетті" дейді журналист.

Журналист Жарас Ниязбек те Мәсімовті босатуға қарсылығын білдіріп, өзгелерді де соған шақырды.

"Уқит-суқит деп Кәрім Мәсімов бостандыққа шығып кетпесін! Ешкімнен жаны артық емес. Жүрегі ауырмай жүрген кім бар қазір? Оның үстіне қашан көрсең марафонға қатысып жүгіріп жүрген адам ол мұрт. Сондықтан, достар, бәріміз талап етейік. Оған тағылған айыптар ауыр. Отанды сату ойыншық емес!" деп жазады ол.

Бүгінде қамауда отырған Мәсімовтің тергеу кезінде анықталған мүлкі бұғатталған. Оған атысты қылмыстық кодекстің төмендегідей 5-бабы бойынша тергеу жүріп жатыр.

♦ ҚК 336-бабы 4-бөлігі – "Пара алу"

♦ ҚК 362-бабы 4-бөлігі 3-тармағы – "Билiктi немесе лауазымдық өкiлетігін асыра пайдалану"

♦ ҚК 175-бабы 1-бөлігі – "Мемлекетке опасыздық жасау"

♦ ҚК 179-бабы 3-бөлігі – "Билікті басып алуды немесе ұстап тұруды насихаттау немесе оған жария түрде шақыру, сол сияқты билікті басып алу немесе ұстап тұру не Қазақстан Республикасының конституциялық құрылысын күштеп өзгерту"

♦ ҚК 218-бабы 3-бөлігі 3-тармағы – "Қылмыстық жолмен алынған ақшаны және (немесе) өзге мүлікті заңдастыру (жылыстату)"

"Қамшы" сілтейді

Ілмек сөздер: Кәрім Мәсімов