Астанадағы өрт аумағы 80 гектарға жетті

Астана маңындағы өртті сөндіру әлі д жалғасып жатыр. Төтенше жағдайлар департаментінің хабарлауынша қазір өрт аумағы 80 гектарға жеткен. 

"Елордалық өрт сөндірушілер Қорғалжын тасжолы мен Қосшы қаласына айналма жол арасындағы қураған шөп және қамыс өртімен екінші тәулік күресіп жатыр. Қазіргі уақытта мамандар қураған шөп өрттерінің жекелеген ошақтарын сөндіруде", - делінген ТЖ департаментінің ақпаратында.

Бүгін таңертең «Қазавиақұтқару» АҚ өрт орнына 17 рет су шашты – бұл 51 тонна су. Өрт сөндіру басталғаннан бері Қорғаныс министрлігі мен «Қазавиақұтқару» АҚ тікұшақтары 59 рет – шамамен 198 тонна су шашқан.

"Оқиға орнында Астана қаласы, Ақмола және Қарағанды облыстары ТЖД жеке құрамының 185 адамы мен 37 техникасы, қала әкімдігінің 6 суару машинасы жұмылдырылды. Қала әкімдігі, сондай-ақ Астана қаласының еріктілер клубының бастамасымен елордалық өрт сөндірушілер ыстық тамақпен және сусынмен қамтылды", - деп хабарлады департамент.