Бүгін Мәжілісте Палата Спикері Қабиболла Жақыповтың төрағалығымен өткен жалпы отырыста Қылмыстық іс жүргізу кодексінің жобасын ілеспе түзетулерімен кейбір конституциялық заңдарына және бірқатар заңнамалық актілерді екінші оқылымда мақұлдады.

Кодекс жобасымен жұмыс барысында депутаттар қорғаушының, тергеу судьясының өкілеттіктерін кеңейтуге, қылмыстық сот ісін жүргізуде тараптардың жарыспалылығы мен тең құқылығын күшейтуге, сондай-ақ, жобаның жекелеген нормаларын жетілдіруге бағытталған бірқатар түзетулер енгізілгенін атап өтті Мәжілістің Заңнама және сот-құқықтық реформа комитетінің мүшесі Рамазан Сәрпеков.

Азаматтардың қылмыстық процестегі құқықтарын күшейту мақсатында куәның, жәбірленушінің айғақтарын сақтауға беру кезінде тараптардың бірдей қатысу жағдайларына кепілдік беретін норма ұсынылды.

Салалық комитет 60 жұмыс тобының отырысын өткізіп, Қазақстан Республикасы Бас прокуратурасының, Жоғарғы Соттың, Конституциялық Кеңестің, құқыққорғау органдары, министрліктер мен ведомстолардың, сонымен бірге үкіметтік емес ұ»йымдардың өкілдерінің қатысуымен  отырыстарда да талқыланды. 

Кодекс жобасының ережелері, сондай-ақ, Астана қаласының сотында, Астана қаласының прокуратурасында, Республикалық адвокаттар алқасында, Астана қаласының Ішкі істер департаментінде және Қазақстан Республикасы Бас прокуратурасының Құқықтық статистика және арнаулы есепке алу комитетінде болған отырыстарда да талқыланды. 

«Қазақстан Республикасындағы сайлау туралы», «Қазақстан Республикасының Парламенті және оның депутаттарының мәртебесі туралы», «Қазақстан Республикасының Конституциялық Кеңесі туралы», «Қазақстан Республикасының Тұңғыш Президенті – Елбасы туралы» және «Қазақстан Республикасының сот жүйесі мен судьяларының мәртебесі туралы»  Қазақстан  Республикасының конституциялық заңдарына түзетулер енгізіліп отыр, олар Қылмыстық-процестік кодекс жобасына сәйкес келтіруге бағытталған.

Сонымен бірге заңнамалық актілеріне қылмыстық іс жүргізу заңнамасын жетілдіру мәселелеріне жаңалықтар енгізу  мәселесі бойынша заңнамалық акті де  екінші оқылымда мақұлданды.

parlam.kz