Ақтау қаласындағы Назарбаев Зияткерлік мектебінің 9-сынып оқушысы Аслан Бақыткалиев грэплингтен өткен әлем чемпионатында қола медалді жеңіп алды. Әзербайжан астанасы Бакуде 8-9 қарашада ұйымдастырылған жарыс жасөспірімдер, жастар және ардагерлер арасында өтті.

Жас спортшы жасөспірімдер арасында 53 келіде бақ сынасып, екі кездесу өткізген.

• Менің салмақ дәрежемде 10 спортшы болдық. Алғашқы кездесуде әзірбайжан спортшысы Гейдар Хагвердилиді (Heydar  HAGVERDILI) ұттым. Ал жартылай финалда ресейлік Темірлан Қараочевпен кездестім. Бірақ ұрыс мен үшін сәтсіз болды, - дейді Аслан.

Айта кету керек, Аслан грэплингпен өткен жылдан айналыса бастаған. Оның қызығушылығы «Lions Fight club» спортшылары өз мүмкіндіктерін теңіз жағалауында таныстырғаннан кейін пайда болған.

• Бапкерім Ислам Долгатов ерекше қызығушылығымды байқап, жарыстарға дайындай бастады. Маған қолдау білдірген ата-анама, бапкеріме, мектебіме алғысым шексіз. Бұдан да биік белестерді бағындыруға тырысамын, - дейді қола жүлдегер.

Аталған жарысқа Қазақстаннан 120 спортшы аттанды. Оның 19-ы маңғыстаулық. Жалпы есеп бойынша маңғыстаулық боксшылар 3 алтын, 1 күміс, 6 қола медальмен оралды.