Осының алдында жазғандарымызда, Алматы облысының диқандары биыл қант қызылшасынан бұрындары болып көрме­ген биікті бағындырып, гектар берекелігін рекордтық деңгейге жеткізгенін баяндаған едік.
 Қыркүйектің соңында «Көксу» қант зауытына өнімдерін өткізе бастағандар арасында гектарынан 700 центнерден, са­па­лы әрі ірі тәтті түбір жинаған сарқандық ша­руашылықтар да болған. Күні кеше об­лыс әкімі Амандық Баталов Сарқан ауданы­на арнайы ат басын бұрып, қант қызыл­шасын өсіріп отырғандармен жо­лықты, әңгімелесті. Қандай қолдау қажет­тігін сұ­рады. Сонымен бірге ауданда са­лынып жат­қан серпінді жобалардың жай-жапсарына үңілді. Қысқа әзірлік барысын саралады.
Облыс басшысы бірінші кезекте аудан шекарасындағы «Самал» шаруа қожалы­ғының қызылша алқабына барды. Десте­леніп жиналып, көлемімен әрі сапасымен көз тартатын тәтті түбірді қолына алып қа­рай жүріп, диқан қауыммен пікірлесті. 
 – Амандық Ғаббасұлы, қызылша өнімін қабылдаудағы 3-4 жылға созылған тоқыраудың салдарынан күтіп-баптауына көп күш жұмсалатын техникалық дақылдан бас тарта бастаған болатынбыз. Биыл да үміттен гөрі күдік басым болып, бар-жоғы жеті гектарға ғана тұқым сіңірдік. Бабы ке­лісіп, судан кенде болмағаннан кейінгі нә­тиже ойдағыдай. Өнім гектарына 500 цент­нерден айналуда. «Көксу» қант зауыты ке­лісімшартта көрсетілген міндеттемеле­­рін толық орындаса, келер жылы қызылша алқабын еселеуге дайынбыз, – дейді шаруа қожалығының басшысы Ермек Қалиев.
Сол жерде сөз кезегін алған облыс әкімі­­нің орынбасары Серікжан Бескем­пі­ров «Көксу» зауыты тарапынан қызылша тасымалдайтын автокөлік шығынының 40 пайызы өтелетінін, басқа да жеңілдіктер қарастырылғанын жеткізсе, Сарқан ауда­ны­ның әкімі Ерғазы Қошанбеков өндіріл­ген өнімді ысырапсыз жинап алу мақ­са­тын­да ұйымдастырылған шараларға тоқталды. Амандық Ғаббасұлы қазылған өнімді жи­нап, дақылды жапырағынан ажыратып, тау-тау қылып үйіп жатқан Сарқан политех­никалық колледжі білімгерлерімен де емен-жарқын әңгіме-дүкен құрып, өндірістік тәжірибеден өте жүріп, қосымша қаржы та­батын жастардың жұмысына сәттілік тіледі. 
Бақалыдағы, Черкасск ауылдық ок­ругін­дегі егістік алқаптарындағы өнім бе­рекелігі сарқандық диқандардың қызылша өсірудің қыр-сырын жетік меңгергендігін көрсетті. Бақалылықтардың арнайы техни­каның көмегімен қызылшаның жапыра­-ғын орып алып, тәтті түбірді комбайн бун­керінен бірден көліктерге тиейтіні басқа шаруашылықтарға үлгі ретінде ұсынуға болтын тәсіл екендігі де әңгіме өзегіне айнал­ды. Осындағы «Аққұдық» шаруа қожалығының басшысы Серікжан Есім­жановтың рекордтық көрсеткішке – гек­-тар өнімділігін 700 центнерге жеткізгенін бұдан бұрын жазған едік. 25 гектар алқаптан 2000 тонна өнім жинауды жоспарлаған қожалық мүшелері алғашқы күндері-ақ 
780 тонна өнімді зауытқа өткізіп үлгеріпті. Ал Черкасскідегі құйқалы алқапқа түрен салған Ержан Мадьяровтың алты ай жаз бойғы тынымсыз тірлігі 105 гектар егістік­тің әр гектарынан 400 -450 тонна өнім алуға негіз қалапты. 
Қойлықтағы «Сарқан Агро» жауап­кер­шілігі шектеулі серіктестігі күтіп-баптап отырған алма бақ облыс басшысының на­зарын аударды. Мұнда 100 гектар аумақтың әр гектарына 800 көшет отырғызылған 66 мың дана алма ағашы үш жылдың ішінде бойлап өсіпті. Келер жылы алғашқы өнім алынбақ. Бақ тамшылатып суару әдісімен өсіріледі. 
Осы бақ аумағында арнайы жабдық­тал­ған көрмеде «Мәди», «Малай би», «Дәу­рен­бек» шаруа қожалықтарының жетекшілері жоспар-жобаларын ортаға салса, аудан әкімінің орынбасары Азамат Сәрсембаев ауыл шаруашылығы бойынша көрсет­кіш­термен таныстырды. 
Сарқанда қуаттылығы 17 МВт болатын «Лепсі-2», қуаттылығы 4,2 МВт болатын «Басқан-1» су электр станциялары салы­нуда. Өңір басшысы осы сапарында таяу­да іске қосылатын, экономикалық маңызы 
зор «Лепсі-2» станциясының құрылысын көзбен көрді. Сондай-ақ аудан орталы­ғындағы орталық қазандықтың қысқа да­йындығын байқап көріп, бірқатар ескер­ту­лер жасады. 
 

Дереккөз: Айқын ақпарат