Мәжілісте палата Спикері Қабиболла Жақыповтың төраға­лығымен өткен жалпы отырыс­та депутат Бақытбек Смағұл Қазақстан Республикасының Қор­ғаныс министрі Иманғали Тас­мағамбетовке депутаттық сауал жол­дады. Онда былай делінеді:

«Бұл сауалды жолдауға Қазақ­стан Республикасы Әмбебап жекпе-жек федерациясының президенті мен осы саладан халықаралық және Қазақстанның еңбек сіңірген спорт шеберлерінің жолдаған хаты себеп болып отыр. Өзіңізге белгілі, Елбасы Н.Ә.Назарбаев халыққа Жол­дауында алдағы жылдарда ел тұрғындарының кемінде 30%-ы бұқаралық спорт түрлерімен айналысуы қажеттігін баса айтты. Мемлекет басшысы белгілеген осы ме­жеге қол жеткізуге еліміздің Әмбебап жекпе-жек федерациясы да үлес қосып келеді.

2010 жылы өз жұмысын бас­таған спорттың бұл түрі балалар мен жастардың спортқа тартылуына өте күшті ықпал етіп отыр. Оның үстіне, әмбебап жекпе-жек спортшылары өз жеңістерімен Отанымыздың беделін халық­ара­лық деңгейде арттыра түсуде. Бұл ретте, Федерацияның қарқын­ды да жемісті жұмысын атап өткен жөн. Осыған дәлел, 2011-2013 жылдар ара­лығында спортшыларымыз Анапа, Медын, Калининград қала­ларында ұйымдастырылған әлем чемпионаттарында, сондай-ақ, Таш­кент қаласында өткен Азия чем­пио­натында барлық жүлделі орын­дардан көрінді. Ешқашан қор­жын­дары алтын, күміссіз бос қай­тып көрген емес.

Әмбебап жекпе-жек 2014 жыл қоры­тындысында ұлттық құра­ма командалар тізіміне, негізгі респуб­ликалық және халықаралық жарыс­тардың күнтізбелік жоспарына, төрт жылдық Олимпиада кезеңін­дегі біліктілік талаптары кітап­шаларына кірді. Осы кезден бас­тап аталған спорт түрі жоғары спортқа қарай үлкен серпіліс жасады.

Былтыр Душанбе қаласында 10 елдің қатысуымен өткен Азия чем­пионатында Қазақстан құрама командасы жалпы есепте 3-орынға шықса, 2014 жылғы Мәскеудегі әлем чемпионатында да отандық құрама командамыз 35 мемлекеттің басым көпшілігін артта қалдырып, үздік үштіктің қатарынан көрінді. Бүгінде 14 облыс пен Астана, Алматы қала­ларында жас ерекшеліктері бойынша әмбебап жекпе-жекпен шұ­ғыл­данушылардың және жаттықтырушылардың саны шамамен 1500 адамға жетті. 2014 жылға қойылған мақсатты спортшылар толығымен орындап шықты. Ал үстіміздегі жылы Ташкент қаласында өткен Азия чемпионатында біздің спортшылар жаңа белесті бағындырып, 11 мемлекеттің ішінде жалпы-командалық есепте 2-ші тұғырға көтерілді.

Бұл спорт түрі бойынша жа­рыстарды Федерация респуб­ли­ка көлемінде де ұдайы ұйым­дас­тырып тұрады. Бүгінгі таңда Ақ­төбе, Атырау, Маңғыстау, Қы­зыл­орда, Алматы, Оңтүстік Қазақ­стан, Ақмола облыстарында және Ас­тана, Алматы, Байқоңыр қала­ларында федерациялар ашылып, Арыстан, Сұңқар, Арлан, Бер­кут, Ұлттық Ұлан, Айбын жауын­герлері өз өнерлерін ортаға салып, күш сынасып келеді.

Құрметті Иманғали Нұрға­лиұлы! Біз Қазақстан спорты үшін әлем алдында ашық мақтана аламыз. Бұл жерде өзіңіз басқарып отырған Қорғаныс министрлігінің де ел спортына жасап отырған қамқорлығы жетерлік. Осы орайда, аталған спорт түрі Қазақстан Республикасы Қорғаныс министр­лігімен бірлесе отырып, әрі қа­рай дамытылса деген ұсыныс бар. ­Себебі, – бұл жауынгерлік спорттың түрі.

Осы мақсатта әмбебап жекпе-жекті әскери жарыстар, басқа да іс-шараларға қосу, ол бойынша әскери бірліктерде спорттық бөлім­дер ашу мүмкіндігін қарас­тыруыңызды сұраймын. Себебі, осы спорт түріндегі кедергі жолдардан өту, пневматикалық тапаншамен нысананы көздеп ату және спорттық пышақты дәлдеп лақтырып, нысанаға дөп тигізу сияқты жаттығулар жауынгерлік дайындыққа өте үлкен көмегін тигізеді, Қазақстан Қарулы Күш­терінің жауынгерлерін ептілікке, төзім­ділікке, батылдыққа баулып, олар­дан сайдың тасындай ірік­телген сайыпқыран сарбаз жасайды деп білемін».

Дереккөз: Егемен Қазақстан