Қайырымдыларға арналған «Алтын жүрек» сыйлығы иелерін тапты
Жылдағы дәстүр бойынша Ал­матыда Абай атындағы опе­ра және балет театрында қайы­рым­дылық сала­сындағы Ұлттық қоғам­дық «Ал­тын жүрек» сыйлығы иегер­лерін марапаттау рәсімі болып өтті.
Еліміздің қайырымды адамдары мен олардың мейірімділіктің үлгісі болған істеріне «Рахмет!» айту салты 2007 жылдан бері ұйым­дастырылуда. Осылайша тоғыз жыл бойына «Алтын жүрек» ұйым­дастырушысы – «Бауыржан» қайы­рымдылық қоры аталмыш сыйлықты тұрақты түрде табыс­тап келеді.
Марапаттау салтанатының ашы­лу рәсімінінде Алматы қала­сы­ның әкімі Бауыржан Байбек еліміз­де белсенді азаматтық қоғам қалыптасқанын айтып, оның ішін­де Наурызбай ауданындағы сел­ден зардап шеккендерге қол­ұшын созған жандарға өз алғысын білдірді.
Сонымен, «Бауыржан» қайы­рым­дылық қорының директоры және сыйлықты ұйымдастыру коми­тетінің төрайымы Жұлдыз Омар­бекова сыйлық тағайындалып жүрген жылдарда қазақстандық қайырымдылық эволюциясының куәгері болғанын айта келе:
– Көмек тек қана ақша­мен өл­шен­бейді, біздің номинант­тар­дың қайырымды істері әртүрлі көлемде болуы мүмкін, басты­сы – өз қалауымен көрсетіл­ген көмек болуы тиіс. Егер бұры­ны­рақ­та қайырымды адамдар үле­сін көбіне қаржылық мүмкіндік­тері көп адамдар құраса, бүгін­де олар­дың қатарын ерікті ұйымдар мен қарапайым адамдар толықты­руда. Сондықтан болар, соңғы 5 жыл ішінде дүниежүзілік қайы­рымдылық рейтингісінде Қазақ­стан 121-орыннан 101-орынға дейін көтерілді. Алайда, біз қайы­рым­дылықты әлі де дамыта беруі­міз керек және алдағы уақытта қайырымды елдердің бірінші жүздігіне, тіпті, елулігіне де ілінерміз деп үміттенемін, – деді.
Қысқасы, лауреаттарды марапаттау салтанаты Turkvision-2014 сайысының жеңімпазы Жанар Доғалованың орындауындағы «Алтын жүрек» әнұранынан бас­тау алды. Алтын жүректі жандарды қолпаштауға келген өнер саңлақтары – Қазақстанның халық әртісі Нұржамал Үсенбаева, домбырашы Асылбек Еңсепов, скрипкашы Жәмила Серкебаева, MEZZO тобы, Қуат Бағысбек, Тол­қын Забирова, Әлішер Кәрі­мов сынды жандар кештің әрін кел­тірді. Әсіресе, Атырау қаласынан арнайы келген өнерлі бүлдіршін Нұр­­мұхаммед Жақыптың орын­дау­ын­дағы «Сәби бақыты» әні көрермендер көңілін босатып, жан тебірентті.
Алдымен «Жетім балаларға көрсеткен көмегі үшін» номинациясы бойынша алғашқы лауреат, яғни 2015 жылғы «Алтын жүрек» иегері – Ақмола облысы Кенесары ауылында 11 баланың әкесі атан­ған Мұрат Қабылбаевтың есімі аталды.
«Білімді дамытуға қосқан үлесі үшін» номинациясы бойын­ша көпшілік Жезқазған бизнес және көлік колледжінің құрыл­тайшысы, ұзақ уақыт бойы білімге қолдау көрсетіп келген Бекзат Алтынбековке қол соқты.
Алматы қаласы атынан ерікті Эльмира Әлиева «Денсаулық сақ­тау саласына көрсеткен қолдауы үшін» номинациясын иеленді. Оның арқасында 90 мың доллардан астам қаражат жиналып, былтырдан бері ауыр сырқатты балалар мен ересек жандар Түркия, Италия, Оңтүстік Корея, Қытайда емделген.
Ал қоғам пікірі бойынша мүге­дектерге орасан зор көмек көрсет­кен «Атырау. Маленькая страна» оңалту орталығының негізін қалаушы әрі жетекшісі Ерлан Күмісқалиев та «Алтын жүрек» мүсінімен марапатталды.
Қызылордалық филантроп Абзал Ералиев «Спортты қол­дап, оны дамытқаны үшін» номи­нациясының лауреаты атанды. Оның пікірінше, жастар өз бола­шағын өздері таңдап, алға дұрыс мақсат қоя білуі тиіс. Ал спортты өз жігерін сынаудағы басты мүмкіндіктердің бірі деп санайды.
Ал ардагерлерге тұрақты көмек көрсетіп, оларға қамқор бола біл­ген «Ореол» ЖШС директоры Сер­гей Коротинға «Ардагерлерге көрсеткен құрметі үшін» номинациясы берілді.
«Жыл меценаты» атағына «Ар­хео­логиялық экспедиция» ЖШС ие болды. Олар өз есебі­нен Қа­зақ­станның тарихи-мәде­ни мұра­сын зерттеп, соған орай түсірген деректі фильм­дері кеңінен таралуы үшін телеар­на­ларға тегін өткізуге ықпал еткен.
8 жыл бойына ақпараттық қайы­­рымдылықпен айналысып, әлеу­­меттік жобаларға қолдау көр­сетіп келе жатқан «Айғақ» телера­дио­­компаниясы «Ақпараттық қол­­дау­­шы» номинациясында аты аталды.
«Жыл ұйымы» номинациясында ең үздік деп Родина ауылы атынан «Родина» агрофир­масы танылды. Иван Сауэр жетек­шілік ететін кәсіпорын көп жылдар бойына ауыл тұрғын­дарына, өз қызметкерлеріне жан-жақты қолдау танытып отырған.
Ал италиялық Россано Тома­селли «Алтын жүрек» сыйлы­ғының «Қазақстанның өркендеуіне қосқан үлесі үшін» номинациясы бойынша марапатталды.
Сол сияқты кеш қонақтары соңғы жылдағы мейірімді және қайырымды істермен таныстыратын «100 қайырымды іс» атты фотокөрме ұйымдастырылды.

"Қамшы"сілтейді

Дереккөз: егемен Қазақстан