Aqmola oblysynyń ortalyǵy Kókshetaý qalasynda Jer reformasy jónindegi komısıanyń alǵashqy kóshpeli otyrysy bastaldy, - dep habarlaıdy Qamshy.kz BNews.kz – ke silteme jasap.

Ótken aptadaǵy úshinshi otyrystyń qorytyndysy boıynsha Jer reformasy jónindegi komısıa músheleri  óńirlerge shyǵyp, halyqtyń pikirin tyńdap, turǵyndarmen tildesýdi uıǵarǵan edi. Barlyq pikirler men usynystar saraptalyp, jan-jaqty tarazylanǵannan keıin ǵana komısıa sheshim shyǵaryp, Parlamentke engizedi. Komısıanyń alǵashqy kóshpeli otyrysy Kókshetaýda ótip jatyr.

Aqmola oblysynyń halqyn tyńdaýǵa Jer reformasy jónindegi komısıanyń 30-ǵa jýyq múshesi keldi. Búgin olar turǵyndardyń barlyq túıitkildi suraqtaryna jaýap berip, pikirleri men usynystaryn qabyldaımyz dep otyr.

Aıta ketsek, Jer reformasy jónindegi komısıanyń buǵan deıingi otyrystarynda Qazaqstan azamattaryna aýyl sharýashylyǵy jerlerin jekemenshikke satý jáne sheteldikterge jerdi 25 jylǵa jalǵa berý máseleleri talqylandy.

Jer reformasy jónindegi komısıa Prezıdenttiń tapsyrmasy boıynsha qurylǵan bolatyn. Jalpy, bastapqyda komısıa quramyna 75 adam kirgen edi, olardyń ishinde Muhtar Shahanov, Muhtar Taıjan, Murat Ábenov, Aıdos Sarym, Bekbolat Tileýhan, Kenjeǵalı Saǵadıev sekildi kópshilikke belgili tulǵalar bar.  

Prezıdent Jer kodeksiniń qoǵamdyq rezonans týdyrǵan birqatar normalaryna byıl jyldyń sońyna deıin moratorıı jarıalady. Nursultan Nazarbaev keń kólemdi túsindirý sharalaryn júrgizip, bul jumysqa búkil partıalar men qoǵamdyq uıymdardy tartyp, jer máselesi boıynsha óz pozısıasyn bildirgen barlyq azamattardy dıalogqa shaqyrýdy tapsyrǵan bolatyn.