Jalǵa alynǵan jerlerdi paıdalanbaıtyn sharýalarǵa 10 esege deıin ulǵaıtylǵan jer salyǵy salynady. Bul týraly Kókshetaýda ótip jatqan Jer reformasy jónindegi komısıanyń alǵashqy kóshpeli otyrysynda QR Aýyl sharýashylyǵy vıse-mınıstri Erlan Nysanbaev málimdedi, - dep habarlaıdy Qamshy.kz BNews.kz – ke silteme jasap.

«Búginde aýyl sharýashylyǵy jerleriniń basym bóligi jalǵa alý quqyǵymen paıdalanylyp jatyr. Sharýa qojalyqtarynda 57 mln 500 myń gektar, agraqurylymdarda 40 mln 200 myń gektar jer bar. Sheteldikter men birikken kásiporyndarǵa jalǵa berilgen jer kólemi 61 myń 10 gektardy quraıdy. Onyń 44 myń 900 gektary  birikken kásiporyndarǵa berilgen. 29 myń 700 gektary qazaqstandyqtarǵa tolyq ótken», - dedi vıse-mınıstr.

Erlan Nysanbaev sheteldikterge qoıylǵan talaptardy da atap ótti.

«Birinshiden, sheteldikterge jerdi jekemenshikke berýge tyıym salynǵan. Ekinshiden, sheteldikterge notarıattar arqyly jekemenshikke rásimdeýge tyıym salynǵan. Úshinshiden, sheteldikterge jerdi shekara mańynan jalǵa berýge tyıym salynǵan. Tórtinshiden, sheteldikterge jerdi jalǵa berýdiń shekti kólemi belgilengen», - dep atap ótti ol.

«Jerdi tıimdi paıdalanbaǵandarǵa qatań shara qoldanylady. Jer kodeksiniń 92,93,94 baptaryna sáıkes jerdi tıimdi paıdalanbaǵan jaǵdaıda májbúrli túrde qaıtarý normasy qarastyrylǵan. Paıdalanylmaı jatqan jerlerge 10 esege deıin ulǵaıtylǵan jer salyǵy salynady», - dep túıindedi ASHM vıse-mınıstri.