Mektep formasy týraly áńgime bir búgin qozǵalyp otyrǵan joq. Birińǵaı mektep kıiminiń úlgisin bekitý, mektep oqýshylarynyń basyna oramal taǵýy syndy pikir-talastar buǵan deıin de boldy. Áli de talaı daý bolatyn sıaqty.

Negizi mektep formasyn tańdaý ata-analardyń erkinde. Ár mektepte ata-analar jıynynda bekitiledi ortaq kıim úlgisi. Demek, bul máseledegi keleńsizditerge baılanysty memleketti, zańnamalardy kinálaýdyń jóni joq. Másele ózimizdiń keńestik oılaý júıesinen alystaı almaı otyrǵan sanamyzda.

Mine, birneshe kún buryn mektepterde sońǵy qońyraý soǵyldy. Myńdaǵan túlek mektepti támamdap, úlken ómirge aıaq basty. Endi sol mektep bitirýshilerdiń sońǵy qońyraý sharasyna kıgen kıimderin qarańyzshy. Keńestik aq fartýk, qysqa ıýbka, taǵysyn taǵylar. Keńes odaǵynyń qulaǵanyna 25 jyl ótse de, sol kıimdi mamyr aıynyń sońynda alasuryp izdep ketemiz. Bazardan tappasaq, arnaıy tiktiremiz. Tipti, ondaı kıim kımeseń sońǵy qońyraýǵa kelmeısiń degen resmı talap bolmasa da, ózimizdi ózimiz áýreleımiz.

Táýelsiz memleket retinde keńestik bilim júıesiniń qaldyqtarynan arylý jaıy óz aldyna, ol kıimderdiń tárbıelik, etıkalyq qyrlaryna da nazar aýdarý kerek. Feısbýk jelisinde Aıda Jeksen esimdi qoldanýshy osyndaı oı tastap otyr.

«KSRO kelmeske ketkeli shırek ǵasyr ótti. Al, keńestik sherýlik kıim úlgisi áli tiri. Ne masqara? Sol bantık, gólfı men qysqa kóılekte qandaı sán bar? Keýde tusy tolysqan úlken qyzdardyń ondaı kóılek kıýi qalaı bolady? Ondaı qyzdardy pedofıldiń armany dersiń!», - degen ol Táýelsiz Qazaqstannyń keńestik úlgiden arylý kerektigin, «Qazaqstannyń KSRO da, Reseı de emestigin» aıtady.

Aıdanyń bul aıtqandaryn áleýmettik jelide qoldaǵandar da, «tarıhty burmalamaıyq» degen jeleýmen qarsy shyqqandar da kóp. Qalaı bolǵanda da 17-18 jastaǵy qyzdardy mektep tabaldyryǵynan osyndaı ashyq-shashyq kıimen shyǵaryp salǵanymyz durys emes sıaqty. Sondyqtan da, ata-analardyń osy máselede ulttyq ustanymdardan alshaqtamaǵany durys.