Memleket basshysynyń Qazaqstan halqyna Joldaýynda kórsetilgen tapsyrmalaryna sáıkes Mańǵystaý oblysynda óńirdiń turaqty ekonomıkalyq damýyn qamtamasyz etý maqsatynda ınvestısıa tartý boıynsha belsendi jumys júrgizilýde. Sońǵy úsh jylda oblystyń negizgi kapıtalyna 2,9 trln teńgeden astam ınvestısıa tartylǵan, dep habarlaıdy Qoǵamdyq komýnıkasıa ortalyǵy.

Ónerkásip jáne ındýstrıalyq-ınnovasıalyq damý basqarmasynyń málimetinshe, bıyl jalpy quny shamamen 230 mlrd teńgeni quraıtyn 17 joba iske qosylyp, nátıjesinde 550-ge jýyq turaqty jańa jumys orny ashylǵan.

-Jyl sońyna deıin jalpy quny 38 mlrd teńge bolatyn taǵy bes jobany paıdalanýǵa berý josparlanyp otyr. Budan bólek, jyl basynan beri iri sheteldik ınvestorlardy tartý jáne ekijaqty yntymaqtastyqty nyǵaıtý maqsatynda jaqyn jáne alys shetelderdiń elshileri men konsýldarymen, sondaı-aq óńirdiń ınvestısıalyq jáne saýda-ekonomıkalyq múmkindikterimen tanysý úshin kelgen sheteldik ınvestorlarmen shamamen 20 kezdesý ótkizildi, – dep habarlady basqarma ókilderi.

Oblystyq ónerkásip jáne ındýstrıalyq-ınnovasıalyq damý basqarmasynyń aqparatyna sáıkes, «Aqtaý teńiz porty» arnaıy ekonomıkalyq aımaǵynyń aýmaǵyn keńeıtý jumystary jalǵasýda. Bıyl onyń kólemi 1,9 myń gektardan 4,4 myń gektarǵa deıin ulǵaıtyldy. Sonymen qatar, arnaıy ekonomıkalyq aımaq quramyna qosý úshin shamamen 23 myń gektar bolatyn qosymsha jer telimderin engizý boıynsha jumystar júrgizilýde.