Aqtaý qalalyq ishki saıasat jáne tilderdi damytý bóliminiń memlekettik áleýmettik tapsyrysy aıasynda N. Jantórın atyndaǵy Mańǵystaý oblystyq mýzykalyq-drama teatrynda "Taǵdyr" atty áleýmettik-psıhologıalyq spektakli ótti.

Shara barysynda qoıylym avtory ári rejıseri Anar Bısenbına kórermenderdiń yqylasyna toqtalyp, qoǵamda únsiz qalmaýdyń mańyzdylyǵyn atap ótti.

- Aqtaý halqy tyń dúnıeni tamashalap otyr. Zalda oryn tapshylyǵynyń ózi – qoǵamnyń óz taǵdyryna beıjaı qaramaıtynyn kórsetedi. Eń úlken qasiret – únsizdik. Jastardyń qoıylymnan ózine qajet oı túıip, qoǵamǵa úles qosýǵa nıettenip kelgenine qýanyshtymyn, – dedi Anar Beısenbına.

Sondaı-aq is-shara barysynda shetelden kásibı rejıser mamandyǵyn meńgergen Barlyq Muńalbaıulynyń «Túbir» ınsta-serıalynan úzindi kórsetildi. Avtordyń aıtýynsha, joba qoǵamdaǵy áleýmettik máselelerdi qysqa formatta jetkizýdi maqsat etedi.

- «Túbir» – men úshin jańa format. Áleýmettik taqyryptardy yqsham túrde kórsetýge múmkindik beredi. Joba Aqtaý qalasynda eki aı boıy birneshe lokasıada túsirildi. Týyndyǵa jergilikti tanymal ártister qatysty, – dedi Barlyq Muńalbaıuly.

Aqtaý qalasy ákimdiginiń baspasóz qyzmeti